No co to jes, że tyn gatunek durch mi kaś łostatnio wraco nazot?

Pisoł żech Wóm niydowno (tukej) ło bojce noir, zaroz potym dostoł żech na kónkurs Hanusiki (kierych przeca Marcin Melón by niy napisoł, jakby wcześnij niy bóło kryminałów noir), a zaś dzisioj rano, na banhofie we Katowicach, kupił żech sie nowy numer miesiyncznika KINO, we kierym Błażej Hrapkowicz łopublikowoł esej "Kino wciónż jes czorne".

Niy byda Wóm sam go streszczoł - ino dowóm znać, że cosik takigo jes i polecóm lektura tego tekstu.

Co to jes noir? Co neo noir? Czymu niykierzy godajóm nawet ło hiper noir (filmy z cyklu "Sin City")?

Jak to jes móżliwe, że z połónczynio amerykańskich powieści synsacyjnych, niymieckich filmów ykspresjónistycznych i francuskigo ygzystyncjalizmu, wznikło cosik takigo jak kino noir?

Skónd to sie wziyło, że w tyj retro-kónwyncji, musi być wżdycki pjykno femme-fatale, zdołowany prywatnych detektyw i łobowiónzkowo, synno atmosfera?

Poczytocie sie ło tym we nowym, marcowym "Kinie".

No, to tyla na dzisioj...

Abo niy!

Wciepna Wóm sam jeszcze recynzjo Asteriksa. Chciołek na to iś z małóm, ale... Ale ło tym poczytocie sie sam nastympnym razym.

Terozki grzecnie paczcie na to, co ło tyj animacje pedziały chopcy ze Sfilmowanych :)