Spielberg, PLAYER ONE, i wszisko jasne. Wszisko? Niy do kóńca...

Paczołek łostatnio tyn film ze sioszczyńcym i sioszczynicóm. Mały niy móg uwierzyć, że przepasowoł to w kinie (tak mu sie podobało, że chciołby to łobojrzeć na wielgim ykranie).

Nale czy naprowdy to jes bojka, kiero chciołbych sam prómować i Wóm propónować? Bojka ło ciupaniu w gry kómputerowe?

Pointa mo niyzło (Spielberg przipómino, coby roz za jaki czos sie wylogować i porobić tyż co w ryalnym świecie). Ale to usłyszymy i łobejrzymy dopiyro na kóniec. Wcześnij, bez cołkie półtory godziny, bydymy paczeć, jak jego bohatyry i ich awatary szczylajóm sie, gónióm po labiryntach i ścigajóm auciskami. 

Łoczoplóns gwarantowany. Z Batmanym, King Kóngiym i dinozaurami w tle.

Beztóż, zamias tyj popkulturowo-wirtualnyj papy, propónuja Wóm dzisioj czi inne bojki. I tak sie skłodo, że wsziskie je wydoł PROMIC.

Dwie pjyrsze (jedna ło pjyrszyj Kómunii, drugo ło pjyrszyj spowiedzi), to ksiónżecki dobrze nóm znanych autorek - Angeli M. Burnin i Marii Cristiny La Cascia.

Pisołek już na Bojkoblogu ło ich wcześnijszych pozycjach (ło różańcu i Dródze Krziżowyj). Terozki móm dwie nastympne.

Tyn sóm biblijny styl (przistympne streszczynia nojważniyjszych fargmyntów Starego i Nowego Tystamyntu) + modlitwy + pytania do przemyślynio + fajniste malunki, na kierych, a to pokoże sie Jyzus, a to Mojżesz, a to Maryja, anioł abo Apostoły... - dobro rzec.

Tak samo, jak i "Wielkanocy koszyczek" - kniga numer czi - tym razym napisano i zilustrowano przez polskie autorki - Halina i Joanna Świrskie.

Łoczami bajtlów paczymy tukej na nojaważniyjsze, świónteczne zwyczaje i razym z nimi dowjadujymy sie, czymu na wielkanocnych stołach mómy baranki, zajónczki (po ślónsku zwane hazokami), jajca, sól abo maszkyty.

Na przikłod sól mo przipóminać nóm ło prowdzie, łoczyszczyniu i prostocie życio. A zaś maszkyty, to tako nagroda za nasze umartwiynia we Wielgim Poście, ale tyż zapowiedź Królestwa Niybieskigo.

Takich ciekawostek jes w tyj knidze wjyncyj - bezto Wóm jóm polecóm, a przi łokazji zachyncóm tyż do zaglóndanio na naszego poratlowego Facebooka. Tam, na fanpage'u Wiara.pl, idzie roztómajte knigi wygrać. Te PROMIC-owe tyż. Beztóż klikejcie, zaglóndejcie i wto wjy - może i Wóm sie poszczyńści? 

*

Audio wersja tekstu znojdziecie tukej