Na' co zrobić, jak sztopło i niy chce iś dalij? :)

Chocioż może łod dziosioj zaś mi te szkryflanie sam lepi pōdzie? Preteks jes - łod tyj niydziele TVP ABC zaczyno puszczać syrial ło Yakarim. Dziynnie ło 15:05! 

Pisoł żech Wōm już ło tym małym, kōmiksowym Indianerze tukej beztōż i animacja polecōm.

To tak pod sioszczyńców.

A pod sioszczynica to kseruja zaś, choby gupi (chobych zaś był na studiach!), roztōmajte łopowiadania.

Na studiach durch my coś kserowali - na zajyńcia, ale i do siebie. Terozki kseruja dō nij. Nojczyńścij teksty z "Nowyj Fantastyki".

Potym je ji dowōm, potym dō nij dzwōnia i czytōmy sie je na raty przez telefōn. Dziynne strōna (abo dwie), i tak to sie kulo.

Pjyrsze było ło trollu i dziołszce, co jōm wysłali do babki (trocha taki skandynawski Czerwōny Kapturek). Nazywało sie "Kōnik z Dalarny" i idzie je znalyź w 5 numerze "Nowyj Fantastyki" z 2019 roku. 

Polecōm.

I durch sznupia za nastympnymi.

I kseruja.

I to by było na tyla :)