Nojlepszo wakacyjno lektura?

Pisłoł żech sam łostatnio ło Lucky Luke'u, a przi łokazji i ło moij fascynacji kómiksami. Łod czego sie łóna zaczyła? Może łod "Koziołka Matołka"?

Miołek w dóma za bajtla jakieś "jego knigi", chocioż to trocha taki kómiks niytypowy, bo bez dialogów w dymkach. 

Tyn pjyrszy, prowdziwy, musioł żech abo widzieć w kalyndorzach górniczych KWK Ziymowit, abo w dóma u kuzynki (była rok starszo łody mie i miała już sterta Tytusów i Kajko i Kokoszów).

Mój pjyrszy kupióny to były "Woje Mirmiła" (w ksiyngarni na Tynczy - ludzie z Tychów wiedzóm kaj to). A potym to już poszło. Thorgale, Asterixy, Spidermany, Batmany i w sumie trwo aż do dzisiej, bo durch śledza nowości, uzupełnióm kolekcje, kupuja kómiksy na prezynt roztómajtym bajtlóm z rodziny...

Ale niydowno trefił żech na niytypowo kniga kómiksowo. To "Zrób sobie komiks", łopublikowano przez ZNAK. Jednym z jyj autorów jes Robert Trojanowski - tyn sóm kiery mo na kóncie na przikłod kolejne tómy pómysłowyj i udanyj "Ksiónżki pod tytułym". Jak jóm kojarzycie, to już wjycie w jakim mńyj-wjyncyj stylu tworzy.

W "Zrób sobie komiks" dołónczył dó niego jeszcze Piotr Kasiński i razym niy ino prowadzóm czytelników przez historia kómiksu, ale na przikłod uczóm tyż jego "jynzyka" i w humorystyczny sposób pokazujóm nóm istota tego medium. Tyj "nojzabawńyjszyj ze sztuk".

A przi łokazji dowajóm tyż pole do popisu naszyj kryatywności. Bo "Zrób sobie komiks" to niy ino kniga, kiero idzie czytać. Cza jóm tyż kolorować, uzupełniać, durch coś dó nij dodować i wymyślać. No i pómogać jyj głównym bohatyróm, co sie nazywajóm Pik i Robi. 

Niy mocie co robć we wakacje? To sie jóm kupcie! :) Bo wygrać już jyj u mie niy idzie. Bo wtoś już jóm wygroł. Wto? A niyjako Bożyna, do kieryj już posłoł żech maila z gratulacjami, a za chwila wyśla ji tyż kniga.