Lucky Luke

Piotr Drzyzga

dodane 2018-06-15 10:06

Downo, downo tymu. Na jednym tyskim łosiedlu... :)

Pamjyntóm, jak za bajtla paczoł żech Lucky Luke'a w tv. Niy miołek pojyńcio, że wziół sie z kómiksu, bo znołek go ino z syrialu animowanego, abo naklejek na piórniku (Lucky Luke i smerfy robiły wtedy u nos, we szkole, naklejkowo furora).

Lubiłek tego bohatyra, bo był westernowy, a przeca western w latach '80 to był TYN gatunek. Co chwila paczało sie w dóma filmy z Dzikigo Zachodu, a i pjyrsze kinowe spómniynia móm z jakimsi Winnetou, abo z "Bolkiym i Lolkiym na Dzikim Zachodzie". 

Potym czowiek z Lucky Luke'a najnormalnij w świecie wyrós.

Pamjyntóm, że po latach, na studiach, był jeszcze film z aktorami (w 2004 Philippe Haïm nakryńcił "Les Dalton"), ale wielgie kino to to niy było.

Dopjyro niydowo zoboczył żech w nowościach katowickij Kómiksiarni, że majóm na składzie prymierowe tómy Lucky Luke'a. A że im cieplij na placu, tym bardzij mi sie za westernym cni (co roku tak móm!), to żech polecioł i kupił sie "Daisy Town". Potym zahaczył żech jeszcze ło antykwriat (jedyn, drugi), z biblioteki tyż żech co wzión i... terozki nadrabióm i nadrabióm kómiksowe zaległości sprzed lot.

Jakim cudym niy czytoł żech Lucky Luke'ów za bajtla? Czymu niy chycił żech sie ich, na studiach? (wtedy łodrodziły sie moje kómiksowe pasje). Naprowdy niy wjym. 

Abo mi kajś umykoł, abo myślołek, że to takie kómiksowe podróby/wersje tylywizyjnego syrialu, kiery trocha mie szterowoł (te Daltóny to były przeca takie gupieloki, że niy szło). 

Za to terozki zaczytuja sie w albumach, kiere lata tymu stworzyli Morris i Goscinny, ale tyż w tych nowych, takich jak "Ziymia Łobiecano", kiere piszóm i rysujóm już inksze autory, ale duch zostoł tyn sóm.

Kapitalny humor, kryskówkowo kryska, pjykne pyjzaże, przigody... - no czego chcieć wjyncyj? 

*

Na kóniec z westernowych klimatów wciepna Wóm sam jeszcze jedna rzec. Piosynka "The One I Love Is Gone", kiero śpiywo Katie Melua. Jak dó mie - westernowo bajadera :)

 

N P W Ś C P S
26 27 28 29 30 31 1
2 3 4 5 6 7 8
9 10 11 13 14 15
16 17 18 19 20 21 22
23 24 25 26 27 28 29
30 1 2 3 4 5 6
Dzisiaj: 19.09.2018