Dróga Krziżowo

Piotr

dodane 2019-02-05 09:00

Przignymbiajónco? Dołujónco? Nic do bajtlów?

Dopjyro co mioł żech sam na Bojkoblogu notka ło różańcowyj ksiónżeczce do bajtlów (tukej), a już prziszła dó mie kolejno "czyńś" - terozki na Wielgi Post. Ło Dródze Krziżowyj z Jyzusym.

Autorki te same: tekst Angela M. Burnin, ilustracje: Maria Cristina La Cascia. Wydoł to tyż PROMIC.

Niy wjym jak wy, ale jo nojczyńścij, jak wleza do jakigo nowego kościoła, to "zwiedzóm go" łoglóndajónc i medytujónc Dróga Krziżowo. Prawie za kożdym razym trefia tam jako postać, poza, gest, kiery mie zafascynuje, zastanowi, do do myślynio...

Za bajtla było trocha inaczyj. Dróga Krziżowo zdowała mi sie rytuałym przignymbiajóncym, dołujóncym - niy przepadołek za tym nabożyństwym. Terozki niy.

Niby niy jes to nic przijymnygo, suchać ło Chrystusowych ciyrpjyniach, a mimo wszisko czowiek sie uspokajo, zagłymbio w modlitwie i biblijnych zdarzyniach. Czasym nawet zdowo sie, choby tam był - dwa tysiónce lot tymu we Jerozolimie!

Na ja, ale do tego cza dojrzeć. A co z bajtlami?

Tukej z pómocóm prziś może PRÓMIC-owo ksiónżecka, z kieryj nojmodsze dowiedzóm sie co to sóm stacje Drógi Krziżowyj: jaki jes ich syns, znaczynie, co symbolizujóm. Jak i po co łodprowiać Dróga Krziżowo. Jakie modlitwy mogóm im w tym pómóc. 

Dobro rzec takie rozważania do nojmodszych. 

Format knigi tyż pómysłowy: kwadratowy, bojkowy, naprowdy fajniście ilustrowany.

Nic ino czytać, łoglóndać i rzykać.    

Bestóż polecóm, a przi łokazji zachyncóm tyż to zaglóndanio na naszego portalowego Facebooka. Bo już niydugo na https://www.facebook.com/wiarapl/ bydzie szło "Droga Krzyżowa z Jezusem" wygrać.

Bydźcie czujni :)

N P W Ś C P S
20 21 22 23 24 25 26
27 28 29 30 31 1 2
3 4 6 7 8 9
10 11 12 13 14 15 16
17 18 19 20 21 22 23
24 25 26 27 28 1 2
Dzisiaj: 19.02.2019