Nojlepij filmowo, bojkowo. A wto jak wto, ale Luc Besson spółczesnym miszczym filmowych bojek i bojkowatych filmów jes.

Już żech sam łó nim kiedyś pisoł (notka pod tytułym Besón sie kłanio), ale prowda jes tako, że ło jego filmach, pómysłach i tym, jako to jes uciycha na nie paczeć, szłoby szkryflać i szkryflać bez kóńca.

Ale jes tyż inkszy powód: bo, widzicie, paczoł żech łostatnio z mojóm sioszczynicóm i sioszczyńcym "Niyzwykłe przigody Adeli Blanc-Sec" i bajtle aż łogupiały na punkcie tego filmu.

Ło jak im sie podobało! Potym musioł żech nawet z nimi robić z Lego pterodaktyla (we filmie tyn ptok, jakimś cudym, furgo nad Paryżym, no to cza go było i z Lego poskłodać).

Wyszło nóm to może średnio, ale, jak to sie godo, pjyrsze koty za płoty i już sznupia na Youtube za filmikami, na kierych jes pokozane, jak zrobić z nich takigo wielkigo, pożóndnego praptoka :) A Wy, jak żeście jeszcze bessónowego filmu ło Adeli niy widzieli, to terozki mocie szansa, bo w nojbliższo sobota, 6 stycznio, pokoże go kanał Super Polsat.

Ło kieryj? Ło 17:30. Polecóm! Tak samo zresztóm, jak jego łostatni film ("Valerian i miasto tysiónca planet"), kiery niydowno pokozoł sie u nos na DVD.

Jo wjym, że dzisioj ludzie bardzij jarajóm sie "Strażnikami galaktyki", czy nowymi "Gwiezdnymi wojnami", ale powjym Wóm, że wedug mje film Bessóna jes łod nich sto razy lepszy.

Czymu? Bo dowo nóm to, co science-fictión dowało widzóm i czytelnikóm łod poczóntku: nowe światy i nowe przigody. 

Starłorsioki (neologizm łod Star Wars) kiszóm sie w tyj swoij zółzie i już ino łodcinajóm kupóny ("Przebudzynie mocy" mi sie za pjyrszym razym podobało, ale kolejne syansy już ino mynczyły i nudziły). Fynomynu "Strażników galaktyki" wcale niy rozumia. Za to "Valerian..." ja. Jes fun, jes gyszpan, sóm łodjechane zwroty akcji, ciekawe bohatyry + roztómajte stworoczki, kiere majóm co grać we filmie, a niy - tak jak w Star Wars - sóm wciepowane w kadr ino po to, coby potym sprzedowały sie jako maskotki.

No, to żech sie trocha poprzezywoł, a terozki nastympny wóntek. Kónkursowy. Bo w sumie czymu niy. Nowy rok, to i nowy kónkurs, pra? :)
 
Miołek do Wos taki mały pakiet z gyszynkami, a tam mjyndzy innymi: 

- płyta CD "Cudów czas" z kolyndami w wykónaniu grupy Albo i Nie 
- audiobook z bojkóm "Zwierzątka z polany"
- ksiónżecka "O Bolesławie, niezwykłej krawcowej..."
- "Ikony. Kolorowanki dla modlitwy i odpoczynku"
- kolorowanka do dorosłych "Jezus mówi do ciebie"
- gadżety portalu Wiara.pl

Żeby tako paka wygrać stykło napisać mi na jako bojka czekocie w 2018 roku. A wylosowano lauryatka to:

Natalia Chrobok z Orzesza

kiero czeko na film "Gnomy rozrabiają" (w kinach łod 25 stycznio).

Gratuluja, paket wyślymy pocztóm.