« Gra "Dawid" Na Śwjynta »

Besón

Znany tyż jako Besson. Luc Besson. Wszisko jasne? :)

Móm łostatnio zaś jakosi jazda na jego filmy. Co ciekawe, niy na te wielkie sprzed lot ("Wielki błynkit", czy "Lełóna Zawodowca"), ale na te, co je nakryńcił łostatnio - takie jak "Angel-A", "Niyzwykłe przigody Adeli Blanc-Sec", "Porachunki", abo "Lucy". Bo to wszysko bojki. Może bardzij takie do dorosłych, ale bojka, to wżdycki bojka.

Ło Adeli pisoł żech pora lot tymu, jak ukozało sie u nos DVD z filmym łó nij. Tukej sie możecie przeczytać tyn tekst.

"Lucy" widzioł żech dwa dni tymu i musza sie jóm jeszcze trocha przemyśleć, ale że to bojka, wiadómo z kożdego zwiastuna.

"Porachunki"? Wariacjo na tymat kina gangsterskigo, ale tako na wesoło, z przimróżyniym łoka, w kieryj bohatyróm wszisko idzie jak z płatka. Choby to bojka była.

No i na kóniec "Angel-A". Ludzie, co to jes za film!

Chopek mo pierzyńskie problymy z chachorami, a do tego takie dugi, że nic ino ciepnóńć sie z mostu do Sykwany i po ptokach. No ja, ino że taki sam plan mo jedna piykno dziołcha, grano przez duńsko modelka Rie Rasmussen. Co to za dziołcha?

Po tytule idzie sie kapnóńć, że anioł (anielica) zesłano bohatyrowi, coby go z problymów wycióngnóńć. Ale jo widziołbych w nij raczyj jego anima, abo może nawet potyncjał, kiery tyn synek (grany przez Jamela Debbouze) mo w swoim wnynczu, ino że sie go niy uświadómio. Niy wierzy w swoje móżliwości.

Taki trocha film psychologiczny. A do tego jaki pjykny! Te czorno-biołe zdjyńcia. Te niyzapómniane kadry. Artistic i magnific! Zresztóm łobejrzijcie sie je sami. Choby ino w tym zwiastunie, kiery Wóm wciepuja póniżyj.

Łoperator Thierry Arbogast to naprowdy miszcz nad miszcze. Takie bojki mi kryńćcie! - apeluja z tego mjyjsca do wszyskich ludzi kina :)

 

© Copyright 2010; Bojkoblog. Wszelkie prawa zastrzeżone.
Skórka: Wakacyjnie | Korzystając z serwisów wiara.pl akceptujesz warunki regulaminu.
Znalazłeś treści naruszające regulamin? Powiadom nas!

 

| załóż konto i pisz bloga

zgłoś błąd