« Śwjynta do kolorowanio Ućycha »

Jak tam, grudniorze?

Bojek Wóm sie zachciywo?

Mje tyż, bo godejcie co chcecie, ale grudziyń to tyn mjesiónc, w kierym bojki, baśnie i legyndy majóm swoje śwjynto.

No tak to wżdycki za bajtla bóło, że na Dziecióntko abo na Mikołoja, dostowało sie knigi z bojkami braci Grimm, a zaś na Barbórka łojciec co roku przinosił ksiónżkowy, górniczy kalyndorz Ziymowita, w kierym szło sie poczytać ło skarbnikach, utopcach i inkszych ślónskich gizdach. A w telewizj, na Śwjynta, tyż zawsze puszczali nojlepsze bojki Disneya.

No i do dzisioj tak móm, że jak ino widza w ksiyngarniach bómbki i choinki, to zarozki właża i sznupia za bojkami - do sioszczynicy i sioszczyńca, a czasym tyż do... siebie :)

Łostanio łobejrzoł żech sie ze żónóm GWIEZDNY PYŁ na DVD. Znocie to? Pora lot tymu był taki film. Trocha choby Narnia, bo podobny klimat i żónglowanie baśniwowymi mótywami. No i łobasada kapitalno: Michelle Pfeiffer, Robert De Niro, Claire Danes abo Mark Strong. 

Tyn łostatni to w ogóle jes mój ulubióny szwarccharakter łod jakigoś czosu ("chacharzył" na przikłod w ROBIN HOODZIE, KICK ASSIE, czy JÓHNIE CARTERZE - moij ulubiónyj science-fictión bojce).

A jak już tak żech najechoł na bojki z kosmosu, to wjycie, że 15 grudnio do kin włażóm nowe GWIEZDNE WOJNY? Niby to ino taki film dodatkowy (nazywo sie ŁOTR 1. GWIEZDNE WOJNY - HISTORIE), ale tyż na niego czekóm i planuja łobejrzeć go razym ze sioszczynicóm. 

Co tam jeszcze?

Na nagrywarce móm ZŁOTY KÓMPAS, z Łostrway prziwiezióne DiViDiczko z pohadkóm "Johančino tajemství" - jak je kiedy z małóm łobejrza, to pewnie tyż Wóm sam łó nich na Bojkoblogu naszkryflóm.

A póki co, czimcie sie, gizdy, i paczcie tam jako. 

I paczcie na bojki.

I czytejcie bojki.

Bo bez nich - jak to godoł stary Habryka z filmu Kutza - świot bółby plaskaty, jak przejechany kot :)

*

Ta fotka co sam robi za ilustracjo, to jes kadr z bojki "Johančino tajemství". Wjyncyj ło tym filmie znojdziecie tukej

© Copyright 2010; Bojkoblog. Wszelkie prawa zastrzeżone.
Skórka: Wakacyjnie | Korzystając z serwisów wiara.pl akceptujesz warunki regulaminu.
Znalazłeś treści naruszające regulamin? Powiadom nas!

 

| załóż konto i pisz bloga

zgłoś błąd