Jóhn Ywangylista Carter

dodane 08:49

Co sam dużo godać - jes to jedyn z tych filmów, kiere w łostatnich latach doszlusowały do moich ulubiónych. Wto by sie spodziywoł...

Pamjyntóm, jak to właziło do kin. Że jako to klynska Disneya. Że wiela piniyndzy na tym potracili. Że kaj takie gupoty z Marsa mogóm kogo zainteresować...

A widzicie, potym sie łokozało, że na świecie tyn film lepij sie doł rady niż w USA, a u mie to już w ogóle skocył do kategorie... dziwnie-ulubiónych.

No ja, bo to sóm takie filmy (choby BARBARELLA abo FLASH GORDÓN), co to uważo sie je za darymne, kiczowate i beznadziejene, a potym... A potym paczy sie je roz, pjónty, dziesiónty i durch sie czowiek myśli, że dzisioj to może niy, ale za tydziyń abo dwa, zaś sie to na DVD puszcza. No i z tym JÓHNYM CARTERYM móm tak samo.

Niby film wakacyjny. Niby western. No ja, ino że gotycki (bo ło bogoczach, co bardzij jednak w amerykańskim mieście, we wielgich ryzydyncjach siedzóm).

Science-fictión? No toć, ino że na tych ich kosmoszifach z Marsa, lotajóm jakesi rzymskie legiónisty, co sie pieróm, jak piraty. A same kosmoszify sóm choby z dżewa zrobióne. Choby je da Vinci poraset lot tymu projektowoł...

Pofyrtany popkulturowy miszmasz, kiery móg sie niy udać, ale tukej akurat wszysko wypoliło. 

Nawet to, że przez pustynia niy jadóm na kóniach, czy kamelach, ino na stworokach, kierych ani w nojbardzij ygzotycznych, ziymskich mitologiach niy znojdziecie.

No ja, mitologia! Czy kino, kómiksy abo gry kómputerowe, dzisioj nóm jyj niy zastympujóm przipadkiym? Dyć nawet Dejah Thoris (ukochano Jóhna Cartera) przipómino bardzij łobjawiajónco sie mu w snach, wołajónco go bogini, niż zwykło ksiynżniczka z bojki.

I tak sie myśla terozki ło Biblii. Lewiatan, jónaszowy wielgoryb, łolbrzim-Goliat, mocarny Samsón, bestyje ze Apokalipsy... Dyć tyla tego mómy, a jakosi nóm to ućyko. Zamias uatrakcyjniać krześcijańsko wiara, chytać sie tego, idzie sie raczyj w haje ło krziże w syjmie, gynder, gejów i inksze in vitro.

Biblia mo pjykne, porywajónce i niysamowite łopowieści - ino cza sie ich nazot chycić. "Wto łodczuwo pragniynie, tyn niych przidzie" - jak czytómy pod sóm kóniec łostatnij ksiyngi Nowego Tystamyntu.

No i widzicie - nawet taki gupi "Jóhn Carter" na DVD umi czowieka nazot do Pisma Śwjyntego prziprowadzić :)

nd pn wt śr cz pt sb

25

26

27

28

29

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

1

2

3

4

5

6

Dzisiaj: 28.03.2024