Pamjyntocie jak żech jakiś czos tymu kómbinowoł, kiero śwjynto mógłaby być patrónkóm Bojkobloga?

Wyszło na to, że śwjynto Rita. Kopciuszek, Śniyżka, heksa furgajónco na mietle, nimfa... - no co to tam niy bóło w jyj żywocie.

Jak chcecie, to tyn wpis możecie sie jeszcze roz przeczytac tukej, a jo dzisioj naszkryflóm trocha ło śwjyntym Kristofie.

W sumie to już żech łó nim szkryfloł - we felietónie na Wiara.pl. No ja, ino że tam to bółó tóm mojóm łómanóm polszczyznóm pisane :)

Łolbrzim? Pół-chop, pół-dog? Tyn, co diobłowi jakysi czos posugiwoł? Abo tyn, co spotkoł pjykne kusicielki Nicea i Akwilina? Roztómajcie w lygyndach łó nim pisali. Jedno jes pewne: do naszych ślónskich bojek taki bohatyr pasuje idyalnie, beztóż ciesza sie, że moje rodzinne, ślónskie Tychy, majóm go za patróna.

To może i jo bych sie go łobroł na patróna Bojkobloga. Chocioż trocha sie wahóm, bo może błogosławióny Herman z Reichenau bółby lepszy?

Niby z bojkami niy mioł za wiela spólnego, ale we knigach i skryptoriach cołkie życie siedzioł, z roztómajtymi tekstami kultury łobcowoł, beztóż może łón by sie lepij nadowoł? Bo przeca bojki to tyż teksty. I to jakie! Móndrościowe, półne archetypowych postaci, sytuacji i naprowdy dowajónce do myślynio.

To jo może sie jeszcze trocha nad tym mynskim patrónym Bojkobloga zastanowia, a Wóm dzisioj poleca ino lygynda ło św. Krzisztofie samego Jakuba de Voragine.

A znojdziecie jóm sam