Wto wiy, czy niy mógła by nióm być świynto Rita z Cascii...

E-lite Distribution wydało niydowno kolejno pozycja z dokumyntalnego cyklu "Ludzie Boga: Fakty. Cuda. Tajymnice". Tym razym jes to "Historia św. Rity".

Z recynzynckigo łobowiónzku wzión żech sie za tyn tómik z dodatkim DVD i... I mie szokło.

Trocha sie bołek, że byda mioł problym pisać ło tyj świyntyj. Że średniowieczno myntalnoś niy bardzo mi bydzie leżeć (pora razy już tak miołek z roztómajtymi mistykami i patrónkami z wieków średnich). A tukej co? Zachwyt!

Tela wóntków i motywów z bojek i baśni w jyj żywocie i legyndach łó nij idzie znolyź, że... hej! (że sie tak po słowocku płyntna) :)

Szklóno trumna, w kieryj spoczywo jyj ciało idzie łoglóndać do dzisioj, czyli Śniyżka sie kłanio. Do klasztoru, w kierym była zakónnicóm dostoła sie... wlatujónc tam. Z luftu! Niykiere zakónnice myślały, że to wiedźma, że na mietle przileciała. Niyprowda! Czech świyntych (Jan Krzciciel, Augustyn i Mikołoj) z nióm tam przileciało, ale wiadómo jak to je z ludziami. I niykiere siostry zakónne w cuda niy wierzóm, bezto trocha Ritóm pómiotały i musiała u nich robić za... Kopciuszka!

Jak Rita umiyrała, zażycyła sie, żeby prziniś ji kwiotek. Róża. No ja, fajnie, ino, że akurat był śniyg i zima. A jednak udało sie. Tak samo jak w roztómajtych bojkach, ło dwunostu miesióncach, żyjóncych jako dwunostu bracików na jakijś magicznyj abo świyntyj górze (zresztóm jedna świynto góra tyż "u Rity" jes) .

Co jeszcze? Choby wypowiedzi roztómajych historyków i religioznawców, kierzy dowodzóm, wiela w legyndach i hagiograficznych łopowieściach ło Ricie pojawio sie wóntków mitycznych, antycznych (ło nimfach na przikłod), kiere chrześcijańsko tradycja przejyła, łochrzciła. Wiela średniowiecznych przesóndów wywodziło sie jeszcze z tradycje starorzymskij.

Tyn - dołónczóny do ksiónżeczki - film dokumyntalny, wyreżyserowany przez Aleksandra Gigante, to istno, intertekstualno uczta. Jako kulturoznowca miołek na nim durch uciecha. Nic ino brać sie za teksty ło tyj świyntyj i sznupać, sznupać, sznupać. Wto wiy co sie w nich jeszcze wysznupie? :)

A film możecie sie kupić w naszym portalowym sklepie - styknie kliknóńć tukej