Dzisioj u mie do wygranio wydano niydowno bez Vocatio fajnisto Biblia z naklyjkami.

Jak żech ino ta kniga dostoł do rynki, pómyśloł żech sie łod razu ło biblijkach. Pamjyntocie je jeszcze?

W kożdyj ślónskij chałpie bóły takie knigi, kiere roz: że w przistympny sposób łopisywały nojważniyjsze biblijne scyny i zdarzynia, a dwa: że kapitalnie je tyż pokozywały na roztómajtych rycinach i ilustracjach.

Pisoł łó nich u nos swego czasu Marek Szołtysek. Prziznoł sie nawet, że łoglóndanie tych łobrozków, to bóła jego pjyrszo szkoła biblijno. "Z zafascynowaniem i jubilerską dokładnością oglądałem każdy detal tych starych rycin. Oglądałem i pytałem całą rodzinę o wszystko, czego nie rozumiałem" - wyznowoł w artykule "Adam i lew, czyli precz z nadinterpretacją", kiery możecie sie przeczytać tukej

Ja, ja. Coś w tych biblijkowych łobrozkach jes. W tych naszych, spółczesnych tyż! Bo jak sie łotwjyróm "Moja pierwsza Biblia z naklejkami. Historia Jezusa i Jego Apostołów", móm to samo.

Pacza na nojważniyjsze i nojśwjyntsze zdarzynia z życio Jyzusa. Widza jak pjykno jes Ziymia Śwjynto. Moga sie przi tym tyż pómyśleć, pómedytować, uspokoić sie...

Tu coś poczytóm, tam sie coś spómna, skojarza, a zaś za mómynt cosik łodkryja. Choby poczeba wytchniynio. Dychniyńcio sie.

Akurat godali my dzisioj w redakcji, ło tym jak sie czasym sami zajyżdżómy. Że czowiek ledwo żyje, bo durch za czymś loto, jeszcze to by chcioł, tamto by musioł, tukej sterta knig do przeczytanio, tam 150 rzecy do załatwjynio i jeszcze, jeszcze, jeszcze coś.

A naroz łotwjyróm róździalik "Poczeba wytchniynio" i czytóm ło tym, że przeca czasym cza łodpłynóńć na pustynne mjyjsce, łodpoczóńć, porzykać trocha, poprosić Boga ło to żeby dodoł sił, wzmocnił nos Swojóm łobecnościóm. Takie to proste, tyla razy godane, wałkowane, a dopjyro terozki doćyro.

I takie móndrości sam znojdziecie, a przi tym nacieszycie łoczy łobrozkami, kiere namalowoł Jose Perez Montero. No i możecie je z dzieckiym pouzupełniać, bo na kożdyj strónie mocie jakoś postać abo przedmiot, kiery cza wkleić. A to gizda Judosza. A to czecigo króla. A to kokota, kiery zapioł, jak śwjynty Pyjter sie zapar. A to ryby, co je Apostoły chyciły... Fajnisto zabawa! :)

***

Miołek dlo Wos jedyn ygzyplarz tyj publikacje. Zadanie kónkursowe bóło takie: cza mi było naszkryflać, kiery z Apostołów je Wasz ulubióny i uzasadnić, czymu akurat tyn. Nagroda dostowo:

Mariusz Szlachcic z Libiąża
(po ślónsku - ze Libjónżo)

Gratuluja, a przi łokazji zapowiadóm nowy kónkurs. Niydugo go sam zaczna, beztóż zaglóndejcie tukej regularnie. Do wygranio bydóm knigi ło samym kómisorzu Hanusiku!