I zaś. Kaj Ślónzok znojdzie to, co dlo niego nojważniyjsze? W Czechach! :)

Jakiś czos tymu żech Wóm zapowiadoł, co Czesko Telewizjo planuje na te śwjynta prymierowo ymitować (tukej mocie tyn wpis), a dzisioj szrajbna Wóm ło tyj bojce, kiero była wedug mje nojbardzij wartościowo.

Mje sie nojbardzij podobało "Kdyby byly ryby". Czymu? Bo roiło sie w nij łod stworoczków, kiere znojdziecie w ślónskich bojkach i folklorze.

Jes sam na przikłod utopiec, połednica, dioboł... No istne archetypy. Ślónskie symbole. I do tego jak pokozane!

Fabuła jes tako, że król i królowo ukradli im Rybie Łoko. Takie wieligie, żiwe, czimane we krauzie, kiere mo pierónowo wiedza, a może nawet umi przepedzieć prziszłość. Choby jaki żiwy mózg z downych, kómediowych horrorów :)

Utopiec ciepie za kara na króla, królowo i cołkie ich królestwo klóntwa - ryby sie tracóm ze stowków i rzyk, i wyndkorze niy majóm co chytać. I to jes dramat, bo przeca królestwo słynyło z ryb! Co tukej terozki robić? Jak ta klóntwa cofnóńć?

Niy byda Wóm zdradzoł szczegółów. Jak chcecie, łobejrzijcie sie sami, bo CTV wciepła to na swojo stróna www i idzie to tam lygalnie (z titulkami-napisami) badnóńć - styknie kliknóńć sam

Mje zachwyciło jak te postacie sóm skónstruowane. Przipóminajóm downych, słowiańskich bogów, kierym ludzie coś wykradli i terozki te bogi ich chcóm ukarać.

Prómeteusz ukrod łogiyń, król i królowo Rybie Łoko. Beztoż bóg wód (utopiec), bóg świota podziymnego (dioboł), bóg nocy (wilkołok) i bogini pól (połednica) zaczynajóm ludzióm mjyszać. No mityczne to jes jak pierón (abo Perun) - tyż starosłowiański bóg, kierego durch tak na Ślónsku, nojczyńścij bez świadómości, przizywómy :)

"Kdyby byly ryby" to bojka kómediowo. Dlo bajtlów. Tako coby był szpas. Ale kajś tam w tle te downe, słowiańskie, wierzyniowe echa sóm.

To tak jak na Wilijo - niby czekómy na narodzynie Chrystusa, a na stole jedzynie, kiere symbolizuje roztómajte, pógańskie kulty, świoty i rzyczywistości. Wjyncyj ło tym możecie sie poczytać u nos na www.religie.wiara.pl. Kónkretnie tukej