Posznupoł żech sie łostatnio po kinowych zapowiedziach i już wjym, na co sie ciesza :)

Byn Stiller czeci roz powraco nazot jako Larry Daley, a z NOCY W MUZEUM robi sie nóm kolejno, hollywoodzko syria, kiero chyba niypryndko sie skóńcy.

Mi to pasuje - lubia te filmy. Idea roztómajtych łożywiónych chopecków facynowała mie już łod bajtla, jak ino pjyrszy roz usłyszołek ło dzielnym cynowym żółnierzyku Andresyna i do dzisioj móm słaboś do tego typu łopowieści. A że w NOCACH W MUZEUM jednego z takich wojoczków gro Steve Coogan, tym bardzij jes na co czekać. Dyć to kómiker jakich mało.

Taki sóm był Robin Williams, kiery zaprezyntuje sie nóm sam jako Teddy Roosevelt. Szkoda że po roz łostatni. Jak wiadómo krótko po nakryncyniu tego filmu umar. Szkoda chopa. Szkoda. Szkoda... Musza sie z jego filmami w dóma zaś jaki mały maratón filmowy zrobić. Bo i jak lepij uczcić wielkigo aktora?

No a drugi film, na kiery chciołbych iś to animowano, kómputerowo ykranizaja kómiksu ASTERIKS I ŁOSIEDLE BOGÓW. Na kolejne filmy, bojki i kómiksy ło Asteriksie tyż zawdy czekóm.

Ło tym jak był u Piktów już żech Wóm pisoł (tukej), to myśla, że jak te ŁOSIEDLE BOGÓW do kin wlezie, to tyż sam co łó nim naszkryflóm.

Ukozki reklamujónce te filmy mocie póniżyj: