Trocha to im trwało, ale już go mómy. Nowy, czidziesty piónty album ło przigotach Asteriksa i Obeliksa w zeszłym tydniu trefił do ksiyngarni.

 

Tym razym galiskie gizdy popłynyły do Szkocji, coby ratować lipsta jednego celtyckigo hibernatusa, kierego w bryle lodu wyciepło morze.

 

Jean-Yves Ferri i Didier Conrad, kierzy zastómpili legyndarny duet Uderzo-Goscinny stworzyli naprowdy fajnisto historia. Pojawio sie w nij potwór z Loch Ness, trocha nawiónzań do "Makbeta" + kupa śmjysznych, szkocko brzmióncych nazwisk (Mac Uch, Mac Aoh, Mac Aronh), a nojwiynkszy chachor mo sam - chyba niyprzipadkowo - gymba jak aktor Vincynt Cassel :)

 

Cieszóm sie bajtle, cieszóm starsze kómiksiorze, ale i same Szkoty, kierzy widzóm w "Asteriksie u Piktów" dyskretno próba wsparcio ich niypodległościowych dónżyń.

 

Jo tyż sie ciesza, bo roz, że szkockie klimaty uwielbióm, a dwa: tyn tóm niy jes żodnóm próbóm łodcinanio kupónów i zbijanio kasy na Asteriksie. Trocha żech sie boł, że tak to może być, ale (cołkie szczyńście!) niy jes. Czytołek to z przijymnościóm, chichrołek sie u tego, ale i myślołek, czy Asteriks zawyndruje kiedy dó nos.

 

Celtycko-ślónskich wóntków w historii mómy w pieróny, ino że wto tam ło tym we Francji słyszoł? Bezto niy ma co czekać, ino cza sie brać samymu za fanowsko wersja ich  przigód. Niydowno media pisały ło "Gwiezdnych Wojnach" po ślónsku, to czymu by i tak samo Asteriksa niy dzióbnóńć? 

 

Zrobić samymu kómiks fanfiction? Abo napisy do animowanyj bojki? To by nawet szło. "Niywolnica Isaura" po ślónsku to był hit. Pamjyntocie?