Kniga "Kōmisorz Hanusik" znocie? To piyrszy kryminał po ślónsku!

No, a tak po prowdzie, to niy ino kryminał, bo przeca tytułowy bohatyr zmago sie sam niy ze zwykłymi przestympcami, ino trocha inkszymi gizdami.

Użyro sie ze ślónskimi stworoczkami, kiere ino przijyły ludzko postać. Na przikłod mocie sam podciepa, połednica, utopca, skarbnika, zmora, fojermóna, jaroszka, czy beboka...

Autor knigi, Marcin Melon (po ślónsku: Melón), fajniście połónczył popularny krymi-gatunek ze ślónskim folklorym i downymi wierzyniami.

Pisze po ślónsku, ale przistympnie, bezto do sie to czytać bez wiynkszych problymów. Niy wynokwio, niy wydziwio... Zresztóm łobejrzyjcie sie sami! Tukej mocie kóncek "Kōmisorza Hanusika" w pdf-ie.

***

Jak wiycie (abo niy wiycie) na Bojkoblogu móm terozki dlo Wos kónkurs, w kierym idzie wygrać kniga ze ślónskimi legyndami. Pytóm sie, ło Wasze ulubióne bohatyry ze ślónskich baśni i bojek. W sumie te melónowo-hausikowe gizdy tyż idzie dó nich zaliczyć :) A link do bojkoblogowego kónkursu mocie sam

P.S.
Melón pisze tyż ło szolce łod świyntyj Hyjdle. Co to takigo? Doczytejcie sie w "Kōmisorzu Hanusiku" abo na strónie muzeum w Nysie. Link mocie tukej

A póniżyj "Szolka tyju" - wywiad z Melónym ło jego knidze, ale i ło ślónskij godce, czy regiónalnyj tożsamości. Było to już na wiarowym serwisie Kultura, ale jak wto niy widzioł, to sie może to tukej tyż łobejrzeć: