Nerwuje Wos, jak sónsiady remóntujóm w dóma i durch za ścianóm wiertajóm? To samo majóm diobły, kierym zaś w piekle larmujóm fedrujónce na grubach bergmóny...

Miyndzy inkszymi i tego możecie sie dowiedzieć z (napisanyj polszczyznóm) knigi LEGYNDY ŚLÓNSKIE, kiero ukozała sie nakładym wydownictwa Damidos.

Sylwia Chmiel wysznupała i łopracowała nojpiykniyjsze ślónskie bojki i podania, a fajniście zilustrowała je Łolga Maria Karczewsko.

Na kartach tyj publikacje aże roi sie łod lyniów, śmierdzirobótek, gizdów, maszkytników, czy chamiedł, co wszysko chcóm habić ino do siebie.

Sóm tukej tyż roztómajte rojbry, diobły i zbójniki, ale i robotne bergmóny (górniki), no i przede wszyskim zasadnicze Skarbniki, łod kierych idzie erbnóńć złoto i drogocynne kamiynie, a nawet dostać nazot utracóne życie.  

Kniga ta mo popularyzować historie, kiere na Ślonsku godo sie bajtlóm łod wieków i robi to kapitalnie. Bezto, jak ino chcecie wiedzieć, skónd sie wziyła Pustynia Błyndowsko, jak Antek i Francek łodkryli wóngel, abo czymu w Żorach łobchodzóm Świynto Łogniowe, musicie kóniecznie po LEGYNDY ŚLÓNSKIE siyngnóńć.

A uważejcie sie na grzychy! Bo jak ich za dużo napochocie, to bydziecie w piekle diobłóm szczewiki, na ich czorcie kopyta, szyć! :)

***

Miołek dlo Wos kónkurs, w kierym do wygranio były czi egzymplarze LEGYND ŚLÓNSKICH. Do kożdego z nich dociepnół żech tyż treska (koszulka) portalu Wiara.pl i inksze nasze cary (gadżety).

Zadanie kónkursowe bóło takie: mieliście mi naszkryflać, jaki jes Wasz ulubióny bohatyr ze ślónskich legynd, baśni i bojek. Procyntowo wyglóndo to mniyj wiyncyj tak:

Skarbnik - 41%
Utopiec - 9%
Meluzyna -9%
Eliasz i Pistulka - 9%
Szcziga - 6%

Progu wyborczego :) niy przekroczyły: Agniyszka z legyndy ło Kluskowej Bramie, Fojermón, Kuba Szabaśnik i jego cera Dorka, Jaroszek, Ondraszek, Połednica, Złotogłowiec i Zmora.

Za wszyskie maile wielkie dziynki, a nagrody dostowajóm:

Teresa Nieradzik z Ornontowic, Anna Łukoszek z miyjscowości Pawonków i Małgorzata Włodarczyk z Bydgoszczy

Gratuluja, pakety jeszcze dzisiej poleca zaniyś do naszego magazynu i chopcy zarozki Wóm je poślóm.