Czyli kniga i kalyndorz adwyntowy w jednym!

Pisza dzisioj na Wiara.pl ło knidze "Jes taki dziyń... bojki i legyndy ło Bożym Narodzyniu". Mojo recynzjo możecie sie znolyź tukej

Wtoś może pedzieć, że to trocha za wszas pisać ło świótecznyj publikacji już teroz, ale tak po prowdzie, jo widza w tym tómiku coś inkszego. Pedziołbych, że to trocha taki literacki kalyndorz adwyntowy z bojkami, kiery może kożdego fajniście wprowadzić w atmosfera świónt. Styknie bez cołki Adwynt dziynnie czytać sie po jednnym tekście z tyj knigi i łobejrzycie jakie to uczucie.

Rok tymu zrobił żech sie sóm na siebie taki eksperymynt z inkszóm knigóm (szegóły sam), a w tym polecóm to samo, ino że z knigóm Ezio del Favero, kiero wydoł Prómic. Zresztóm jedyn ciekawy adwyntowy wóntek tyż w nij jes. Idzie mi ło łopublikowano tam legynda ło sztyrech aniołach.

Kożdy z nich jes choby patrónym jednego, adwyntowego tydnio. Piyrszy, niybieski anioł, cołki tydziyń zachynco ludzi do dobroci. Drugi (cerwóny) do miłości. Bioły (taki trocha mistyk) uświadómio nóm istniynie wewnyncznego światła, kierym emanujymy dziynki szczyńściu. Łostatni (fioletowy) to patrón pokoju. Ciekawe, pra?

Tak samo, jak Śniyżka, kiero tyż w "Jest taki dziyń..." sie pojawio (i to w aż w dwóch bojkach), a kożdo z nich jes inno, niż ta, kiero znómy łod braci Grimm, abo Walta Disneya.

Bojkoblog poleco!