Zastanawioł żech sie sam niydowno, czy by sie niy wzióńć za legyndy ło świyntych.

Cołko notka "Idea" z czwortego października jes ło tym i - jak to z patrónami i aniołami stróżami bywo - suchajóm nos i czasym zaingerujóm w nasze życie, tak, że ani by my sie niy pómyśleli. A jeszcze, że im to tak roz-dwa idzie?!

Ledwo żech tyn wpis na Bojkoblogu zrobił, a już za chwila mioł żech na mailowyj krzince info z wydownictwa Prómic, że akurat ciepli na rynek "Legyndy chrześćijańskie", kiere wybroł ksióndz Stanisław Klimaszewski i Luiggi Santucci.

Pedzieć "niy" niy szło (z patrónami lepij niy zadziyrać :) ), bezto cza było brać ta kniga i czytać. A tak po prowdzie to czytać, czytać, czytać, bo to jes prawie pjynset strón nojpiykniyjszych katolickich legynd i bojek.

Autory podzieliły sie te teksty na sztyry czyńści: piyrszo jes ło Chrystusie, drugo ło Matce Boskij, czecio ło świyntych, a czworto to trocha taki miszóng-maszóng, w kierym idzie trefić na pustelników, diobły, a nawet na pana Twardowskigo czy... wympira.

Mie sie na przikłod bardzo podobo zamieszczóno w tómie legynda świyntego Grzegorza z Tours ło siedmiu śpióncych z Efezu. Może bezto, że przipómino trocha naszo ślónsko legynda ło śpióncym wojsku świyntyj Jadwigi?

No ja, efezioki śpióm na Łolimpie, a nasze wojoki na bytómskij Sroczyj Górze, ale wóntek podobny, a i uciecha przi czytaniu jednako.

Udano jest tyż historia o świyntyj Zycie i aniołkach, kiere przipóminajóm trocha krasnoludki. Zresztóm jak chcecie, możecie sie jóm u nos przeczytać. Styknie kliknóńć tukej

A jak sie chcecie "Legyndy chrześcijańskie" kupić, możecie to zrobić w naszym sklepie www.sklep.wiara.pl