Tak sie myśla, czy by sie niy wzióńć za legyndy ło świyntych. Zaczóńć je zbjyrać, streszczać, spisywać na portalu.

Piykno to spuścizna, durch sie na nie kajś natykóm, a i móm syntymynt za czasami, jak żech na Wiara.pl zbjyroł i spisywoł żywoty roztómajtych patrónów, za kierymi możecie sie posznupać w naszym dziale Świynty na dzisioj

Bojki, legyndy, podania, baśnie... - wóntki z tych roztómajtych przeca gatunków, durch sie ze sobóm motlajóm, przenikajóm, a i niyroz jedne sóm inspiracjóm dlo drugich.

Na naszym serwisie Prasa znod żech łostatnio kapitalny tekst ło świyntym Janie Paulusie, kiery nosi tytuł "Świynty zwiyrz". Niby klasyczno, średniowieczno hagiografia, ale tak naprowdy... czego tam niy ma!

Jes niysamowity las, w kierym naszego patróna straszy diobeł. Jan Paulus niy miyszko tam może w chałpce z siódymkóm cwergów, ale... blisko. Zajmuje przeca plac, kiery wydeptała i mościła przez siedym lot niydźwiedzica i nasz świynty tyż siedym lot tam miyszkać bydzie.

Pojawio sie porwano królewna, jes kóniecznoś wycióngniyńcio z piekła duszy prababki, królewskie polowanie, no i przemiana świyntego w zbójnika, a potym chyba nawet we wilkołaka (tak to przinajmij widzi jedna paniczka z pałacu)!

A przi tym wszyskim, na kóniec, zdocie sie sprawy, że mocie szansa wlyź na ściyżka, kiero do raju wiedzie, i kiero chróni przed chciwościóm i złym.

Świynto baśń, hagiograficzno bojka i kościelno legynda jak sie paczy za jednym zamachym. Co Wóm byda wjyncyj pisoł - przeczytejcie sie jóm sami. Jest tukej

No, a ta ilustracja, kiero sam widzicie, to malowidło z klasztoru na Świyntym Krziżu. Św. Stefan dowo relikwie świyntymu Ymerykowi. Reprodukcja Hynryk Przóndzióno /GN.