Mom wakacje. To mom też trocha czasu na to, coby połazić po dochtorach. Bo jak wiadomo - czasu na to trza sporo.

Obrozek piyrszy:

Bolom mie pleca. Dokuczo mi to na tela, że ida do poradni rehabilitacyjnej. Tam sie dowiaduja, że potrzebne mi skiyrowani łod lekarza rodzinnego. A nawet, jak już z nim przida (ze skiyrowaniym, niy dochtorem), to i tak byda musiała czekać 3 miysionce.

Po jakimś czasie ida do rodzinnego. Tyn stwierdzo, że najpierw to on sam musi spróbować mie wylyczyć (!) zanim mi do skiyrowani. Pyto, czy uprawiom sport jakiś (co powjym, to bydzie źle - boli abo z braku sportu abo z przecionżynio). Posyło mie na RTG.

Pora dni późnij ida do pracowni RTG. Okazuje sie, że na zdjynci moga przijść na 4 dni - trza być przigotowanym: dieta i inksze taki...

Po szterech dniach ida na zdjynci. Na szczynści ni ma kolejki. Moga se je przijść odebrać na drugi dziyń.

Jak już mom to zdjynci, to je za późno, coby sie rejestrować do rodzinnego - poczekom do prziszłego tydnia.

Dzisio ida do rodzinnego - je na urlopie na 2 tydnie. Ida do tego, kiery przijmuje. Oglondo te zdjyncia i godo: "No ja, tu som żebra, tu biodra, tu kręgosłup" (potrzebowoł na to 6 lot studiów?). Odsyło mnie do ortopedy.

Ida tam jutro.

Pleca dalij mie bolom. Ale przinajmij dużo spaceruja.

Obrozek drugi:

Musza iść do okulisty. Na szczynści nie trzeba skierowanio ;)

Na stronie internetowej kliniki, w kierej żech była ostatnio, szukom numeru telefonu. Okazuje sie, że moga sie zapisać osobiście, telefonicznie, faksem abo mailem. Ryzykuja i posyłom maila. Po 20 minutach (dwudziestu!) dostowom odpowiedź - je żech zapisano na wizyte za trzi tydnie, mom sie zjawić pół godziny wcześnij w rejestracji.

A wjync jednak sie do - po ludzku, do ludzi.