Poczet królowych polskich

Piotr

dodane 2018-10-15 11:00

Bojka? Kniga historyczno? To mómy pytanie!

Downo, downo tymu, na przełómie lot '80 i '90, za kożdym razym, jak my ino jechali do babki do Bogucic, musielimy wlyź do tyj wielgij ksiyngarni za Spodkiym. Dóm Ksiónżki - tak sie chyba nazywała. 

Lakierowane łokładki Tómków Szklarskigo, wielgie formaty disneyowskich bojek (A4, a może i wjynksze), knigi ło historii (Wikingi, antyczne Greki, Grunwaldy roztómajte)... - to pamjyntóm nojlepij. 

Niby wszysko to już terozki downo i niy prowda (zamias ksiyngarni jes tam bank, Biedra, abo inkszo Żabka), ale roz za kiedy mignie czowiekowi przed łoczami jako kniga, kiero niby jes nowowydano, spółczesno, tegoroczno, a jakimsi cudym przipómino tamte bajtlowskie czasy.

Tak jes z knigóm POCZET KRÓLOWYCH POLSKICH (autorka: Anna Kaszuba-Dębska, wydownictwo ZNAK). Bo format "disneyowy", a tymatyka tako, jak mie za bajtla nojbardzij fascynowała. Historia!

Chocioż tukej cza by napisać raczyj herstoria, bo to z punktu widzynio kobjyt i przez kobjyta jes pisane. Nale dziynki tymu mogymy sie dowiedzieć chociożby tego, że pjyrszóm polskóm pisarkóm bóła Gertruda, cera Ryhezy i Mieszka II. Abo że Poloki miały roz prawosławno królowo (Helyna Moskiewsko, baba Aleksandra Jagiellóńczyka). Abo że pjyrszo polsko gazeta ("Merkuriusza") założyła Ludwika Maria Gónzaga - żóna (kolejno ciekawostka) i Władysława IV, i Jana II Kazimierza...

Mógbych tak dugo Wóm sam wypisywać, co żech w tyj knidze wyczytoł i co łobejrzoł (bo jest tyż pjyknie, pómysłowo, a czasym i dowcipnie, zilustrowano malunkami samyj autorki). Nale przeca niy moga - bo co byście sami potym czytali? :) A naprowdy jes co.

Ło królach, ksiyńciach i inkszych takich uczóm nos we szkołach. Ło ich żónach, cerach, matkach i babkach już niy. No to tukej możecie sie, w przistympnyj formie, nadrobić ta wiedza i potym już nic ino jóm pogłymbiać. Na przikłod czytajónc knigi Kamila Janickiego, kiere tyż ZNAK wydowo.

N P W Ś C P S
30 31 1 2 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 31 1 2
3 4 5 6 7 8 9
Dzisiaj: 19.01.2019