Abo bojkoblogowe potyczki z Wiedźminym.

No wto by to pómyśloł, że przidzie taki czos, że byda mioł faza na Wiedźmina...

Jak w 2001 roku film łó nim właził do kin, niy powjym, nawet żech na niego czekoł. Rozczarowoł żech sie łokropnie (jak chyba wszyskie kinomany), beztóż pómyslołek sie, że może lepij bdzie poczytać knigi Sapkowskigo, kierych wcześnij żech niy znoł. No to żech zaczół i... roz-dwa żech skóńczył.

Szterowało mie te mjyszanie spółczesnyj tymatyki do zdarzyń z wieków średnich, a i jynzyk Sapkowskigo niy przipod mi za bardzo do gustu (niby archaizowoł, ale średnio mu to wyłaziło). 

Potym żech jeszcze, po duższym czasie, ze dwa abo czi razy do Sapkowskigo podłaził, ale za kożdym razym było to samo. - Chobych niy wjym co robił, to niy jes mój pisorz.

Ale zaś bohatyrów na przikłod wykryowoł naprowdy ćykawych. Wiedźmin, Yynnefer, Jaskier, Ciri... - takie trocha archetypy. Ikóny. Niy cza być fanym, a tak sie ich zno, pra? 

Beztóż, jak żech ino usłyszoł, że jes tako kniga, jak SZPÓNY I KŁY, w kierył ło tych postaciach pisze niy Sapkowski, a inksze autory, to żech sie pómyslół, że ja. Że czymu niy. Takie coś to bych nawet móg spróbować czytać. I powjym Wóm, że to był szczał w dziesióntka.

Utopce, elfy, heksy, żar-ptice, szczigi... - roztómajte bohatyry, roztómajte perspektywy i, co nojważniyjsze, niyszablónowe pómysły autorek i autorów. 

No wcióngło mie to łod razu i już za chwila żech żałowoł, że w knidze wydrukowali ino jedynoście łopowiadań. A miały ich te pieróny sto pińdziesiónt! Bo tyla tekstów prziszło na kónkurs na nowela ło Wiedźminie, kiery łogłosiła NOWO FANTASTYKA. 

No nic, jak sie niy mo co sie lubi, to sie... paczy na tv. A tak sie skłodo, że łostatnio tv METRO puszczo syrial ło Wiedźminie. Tyn, co to z niego wykroili tyn niyszczynsy kinowy film, ło kierym żech już spóminół. Ale powjym Wóm, że sóm syrial niy jes wcale taki zły. Wiadómo, niy jes to żodno GRA ŁO TRÓN, ale już taki polski JANOSIK z 1973 r. abo angielski ROBIN Z SHERWOOD z połowy lot łosiymdziesióntych? No do sie paczeć, no. A jak jeszcze pusci sie to czowiek na przikłod po czesku. Łooooo. No to już w ogóle mo sie richtich szpas. A Youtube mo przeca ZAKLINACZE w swoij łofercie :)

Potym żech jeszcze wysznupoł kniga ŁOPOWIEŚCI ZE ŚWIATA WIEDŹMINA z 2013 roku, w kieryj roztómajte ruskie i ukraińskie autory skłodajóm hołd Sapkowskimu i tyż fahniście piszóm ło Nilfgaardzie, Rivii i inkszych wiedźminowych landach i regiónach.    

No i z tego wszyskigo kolejny roz chycił żech sie Sapkowskigo. Ale ino mi sie potwierdziło to, co żech już lata tymu widzioł: archaizacja to jego pjynta Achillysa (dialogi sóm trocha takie Kargulowo-Pawlakowe. Szkoda, że niy pisze mu ich Anna Brzezińsko - wedug mie polsko/opolsko miszczyni).

No ja, ale zaś z drugij stróny (granice) - łod czego mo sie Czechów? 

Myśla, że jak tam zaś kaś pojada (na Moravy i na Slezsko), to kupia sie jakigo Wiedźminia przetumaczónego do czeszcziny, a všecko bude v pořádku :)