Króle, wojoki, powstańce, ułany...

Jak sie tak wejrza, co sam łostatnio, na Bojkoblogu, szło poczytać, to widać, że cióngnie mie abo w słowiańskie (rusko-czeskie) klimaty, abo w literatura brytyjsko (szykowne bojki ło myszkach, "Niy zy mnóm takie tere-fere" Jima Smitha...). Beztóż dzisioj propónuja Wóm cosik trocha inkszego. 

Wydownictwo Skrzat łopublikowało niydowno ciekawo kniga Dónaty-Dóminik Stawickij "Nad nami orzeł biały. Legendy i opowiadania z historii polski". Myśla sie, że ta pozycjo idzie polecić tym wszyskim, kierym bliski jes polski patriotyzm i to, co sie mjyndzy Łodróm a Bugiym przez łostatnie tysiónc lot dzioło. 

Króle, wojoki, powstańce, ułany... - bohatyrów jes sam naprowdy łod gróma. Sóm tyż tymaty ryligijne (lygyndy ło Matce Boskij Łostrobramskij, kozaniu ksiyndza Skargi, abo tekst ło śwjyntym królywiczu Kazimjyrzu i cudzie kierego dokónoł po swoij śmierci).

Mje nojbardzij podobały sie poczóntkowe teksty z tyj knigi, z kierych wyniko na przikłod, że Lech, Czech i Rus wcale niy przybyli dó nos z terynów dzisiyjszyj Chorwacje, jak to sie czynsto słyszy, ino z Północy, bo to były Wikingi i tak po prowdzie nazywali sie Bochym, Lech i Ruryk. Tyn pjyrszy pojechoł na połednie i zawojowł Bochymia (znaczy sie Czechy), a tyn łostatni na Wschód i to łod niego wziyna sie dynastio Rurykowiczów. A Lech? Wiadómo. Tyn doł poczóntek Polokóm...

Takich lygyndarnych ciykawostek znojdziecie tukej dużo, dużo wjyncyj, a jo radza Wóm łobejrzeć sie tyż, jak ta kniga jes wydano. Pjyknie, starannie, choby jaki album. Kapitalne sóm tyż ilustracje Kazimjyrza Wasilewskigo. Impresyjne, mgliste, synne... - choby wyłóniały sie nóm z mroków dziejów. Sama przijymnoś je przeglóndać!

*

Łod wydownictwa Skrzat miołek do Wos, na kónkurs, jedyn ygzymplorz tyj knigi + dodatkowo czi małe ksiónżeczki z cyklu Klub Małego Patrioty ("Polskie symbole", "Polskie samoloty" i "Polskie statki"). Dociepnółek tyż kubek z logo Wiara.pl. A wszyskie te nagrody dostowo:

Aleksandra Szymczyk z Jasła

za polecynie mi lygyndy ło tym, jak to Warzycki farorz łodwiedził papjyża we Watykanie.

Gratuluja! Pakiet z nagrodami jeszcze dzisioj Wiara.pl wyśle do Pani pocztóm.