A co tam w kinach we wakcje? Bydzie co ciekawego?

No toć. Zrobił żech sie łostatnio przeglónd nowości i musza Wóm pedzieć, że bojek do modych i modszych nóm w te lato niy braknie. 

KAPITAN MAJTAS wyglóndo kómiksowo (choby wtoś jaki kómiks łożywił). VALERIAN I MIASTO TYSIÓNCA PLANET tyż może być dobre. Luc Besson (po ślónsku Besón) to jest tyn chop, co jak mało kiery ryżyser umi wymyślać i łopowiadać łodjechane historki, beztóż na tyn jego nowy film czekóm. Ale i tak nojwynkszym bojkoblogowym, filmowym wydarzyniym tych wkacji sóm dó mie NIYDOPARKI.

Ta animacjo to czesko produkcjo, kiero łopowiado ło przigodach stworoczków z knig Pavla Šruta. Pjyrszy tóm šrutowyj trylogie zostoł uznany w Czechach za kniga dekady, jak idzie ło literatura do młodszych czytelników. I powjym Wóm, że wcale sie tymu niy dziwia. 

Roz, że autorowi udało sie stworzyć cołkiym nowe chopki (gumisie, smerfy, miniónki... - wto niy mo rod takich neo-cwergów?). Niydoparki to kolejne stworoczki w tym stylu i miołech wielko ućycha wczytywać sie w ich przigody. 

Dwa, że Šrut napisoł swoja kniga (czytołek ino ta pjyrszo, nagrodzóno) we formie łopowieści ło gangsterach (Padre jes choby łojciec chrzestny, Mojita jes jak Gilda, a Kudła Dederón to mody gniywny, kierymu marzy sie przejyńcie władzy w gangu). 

Ale same niydoparki to niy wszysko. Bo sóm tukej i ludzie, kierym te gizdy kradnóm fuzekle (bo musicie wiedzieć, że żywióm sie łóne... ludzkimi skarpetami).

Pofyrtane? Ja. Ale w nojlepszy możliwy czeski sposób :) Bo przeca niy brak w tyj knidze tyż typowego, czeskigo humoru. A to wtoś sie łożre w hospodzie, a to wtoś spokopi na pogrzybie, że mo gołe nogi i tak jynknie, że inksi myslóm, że rycy za niboszczykim i tyż zarozki zaczynajóm płakać. 

A tak w ogóle to terozki "świat wryncz tónie we fuzeklach! To wszysko przez te Chiny" - jak godo jedyn z bohatyrów knigi :)

Jedynostego siyrpnia NIYDOPARKI zaatakujóm polskie kina. W Czechach poszło na nie 300 tysiyncy ludzi, co jest naprowdy dobrym wynikiym (pamjyntejcie, że Czechów jes sztyry razy mnij niż Poloków).

Jo sie nojbardzij ciesza, że zaś byda sie móg popaczeć na mojo ukochano Praga. Już w pjyrszym kadrze zwiastuna widać tančící dům, železniční most, wieża telewizyjno na Żiżkowie... - moje miasto! :)