Niy zy mnóm takie...

dodane 15:46

...tere-fere!

Pamjyntocie Kacpra Niywypała? Podobały sie Wóm knigi ło tym giździe? Ich styl, humor, tympo i cołko ta absurdalnoś, choby żywcym wziynto z Mónty Pythóna?

Jak ja, to móm do Wos dobro wiadómoś. ZNAK wydoł niydowno kniga Jima Smitha "Niy zy mnóm takie tere-fere", kiero naprowdy bardzo przipómino to, co szło poczytać (a i połoglóndać) w kolejnych tómikach z przigodami Niywypała.

Tukej główny bohatyr nazywo sie Bartek Frajer i robi wszysko, coby go żodyn ło frajerstwo niy posóńdził. Niystety. Niy bardzo mu to idzie i nawet jego ykranowy idol (superbohatyrski Kósmiczny Szczur), niy jes w stanie mu za bardzo pómóc. Bajtel, jak już, to mści sie na swoich (nojczyńścij urojónych) wrogach przede wszyskim w wyłobraźni, ale w ryalu, mało co z tego wyniko i dalij mo przekichane.

No to wymyślo kólejne i kólejne gyniale plany, a kożdy z nich i tak biere w łeb...

Autor fajniście łopisuje i ilustruje codziynny żywot Frajera. Szkoła, chałpa, rojbrowanie na placu... - myśla, że niy jedyn bajtel sie łodnojdzie w tym świecie, w kierym na przikłod, razym z dziadkiym-niywidziadkiym, łazi sie na zakupy do marketu ło nazwie Fresko :)

Takigo pofyrtanego humoru (upaniyrowane brwi!) jes tukej łod gróma, beztóż, jak wtoś mo rod absurd i kurioza, to na bank mu sie ta kniga spodobo. A jyj forma tyż jes ciekawo. 

Bo to trocha taki pół-kómiks. Na kożdyj stórnie rysunek. Tekstu niy za wiela. Ale za to śmjyszne to wszysko niymożebnie. I nawet jo, stary kóń, co niydugo sztyrdziśc lot skóńczy, roz za razym lachoł żech sie z tego na cołki głos :)

Miołek do Wos jedyn ygzymplorz tyj knigi. Pytanie bóła takie: jak sie nazywo autor przigód Kacpra Niywypała? Podejcie imie i nazwisko pisorza.

Tyn chop to Stephan Pastis, a nagroda dostowo:

Agniyszka Buczek z Tychów

Gratuluja, jeszcze dzisioj kniga (+ niyspodzianka) zaniesa do wysyłki.

nd pn wt śr cz pt sb

25

26

27

28

29

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

1

2

3

4

5

6

Dzisiaj: 19.03.2024