« Piraty ilustrowane Mysio bojka »

Gizd Jedyn

No to żech sie wkryńcił...

Na te nowe Star Wars mioł żech iś w grudniu do kina ze sioszczynicóm. Ino jak żech poczytoł recynzje, kaj durch szkryflali, że to niy jes do bajtlów, że wojynne i dołujónce, to żech sie pómyśloł, że łóna na to trocha za mało może być. A że samymu mi sie łazić niy chciało, no to poczkoł żech sie, aż ROGUE ONE (po ślónsku GIZD JEDYN) bydzie na DVD.

Trocha żech tyż w tyn film niy wierzył. Poprzednie PRZEBUDZYNIE MOCY niby mi sie podobało, ale im dużij łó nim myśla, tym wjyncyj widza tam roztómajtych gupot i rzecy, kiere mie (niystety) szterujóm. W sumie: wiela razy idzie paczeć to samo?

A potym pómyśloł żech sie ło westernach. Niby durch te same mjyjsca, bohatyry, zdarzynia, a tela tego w dziejach kina naczaskali i przeca dalij nowe westerny kryncóm. I to cołkiym niyzłe. Czy z GWIEZDNYMI WOJNAMI bydzie tak samo? 

Jakby kożdo produkcjo z tego uniwersum bóła na takim samym poziómie, jak GIZD JEDYN, to jo byłbych happy. Paczoł żech sie te przigody Jyn Erso tak samo, jak czidziści lot tymu na to, co wyrobioł Luke Skywalker i Han Solo. Nic mi tam niy zgrzito, niy kiczuje...

Takie MROCZNE WIDMO, czy ZYMSTA SITHÓW to bóły klynski. PRZEBUDZYNIE MOCY i ATAK KLÓNÓW - takie "fifty-fifty" filmy (niby popaczeć szło, ućycha z tego mieć, ale to jeszcze niy bóło to). A tyn nowy GIZD JEDYN mo ta sama chropowatoś, tak samo zmaraszóny jes, jak na przikłod stare, dobre IMPERIUM KÓNTRATAKUJE.

Mómyntami miołek wrażynie, że niy pacza go na DVD, ino na zjechanym, pożycónym od ujka z Bogucic VHS-ie. Naprowdy! 

Mój wewnynczny bajtel łożył, łodżył i niy mo zamiaru nikaj sie brać, ani zanikać! :)

A przi łokazji: za drugim razym puścił żech sie ROGUE ONE z włoskimi napisami i tak sie je terozki spisuja, tumacza i ucza sie na nich włoskigo. I powjym Wóm, że włoski i science-fictión jakoś mi sie ze sobóm klejóm, łod kiedy ino poamjyntóm.

A to w dzieciństwie BARBARELLA sie po włosku (ale z polskim lektorym) paczało, a to GYNERAŁA DAIMOSA, a to FLASHA GORDÓNA... No tak mi sie to kajś w gowie pokodowało, że jynzyk włoski + roztómajte kósmiczne przigody to jes to! I w sumie, niych tak już łostanie...

© Copyright 2010; Bojkoblog. Wszelkie prawa zastrzeżone.
Skórka: Wakacyjnie | Korzystając z serwisów wiara.pl akceptujesz warunki regulaminu.
Znalazłeś treści naruszające regulamin? Powiadom nas!

 

| załóż konto i pisz bloga

zgłoś błąd