Tak sie pówinno pisać knigi do bajtlów!

Pisoł żech Wóm sam łostatnio ło moich pirackich inszpiracjach, no i tak żech sie pómyśloł, że może bych tak posznupoł za czym nowym w tych klimatach. Trocha mi to trwało, ale jak żech już najechoł jedna fajnisto kniga, to czytoł żech jóm choby gupi i niy móg żech sie łoderwać. 

Jako to kniga? ILUSTROWANE ŁOPOWIEŚCI ŁO PIRATACH, kiere w Polsce wydała Firma Ksiyngarsko Olesiejuk. Te przetumaczóne z angielskigo łopowiadania do nojmodszych to, wedug mie, teksty idyalne. Krótkie, kónkretne i naprowdy śmjyszne. Tak sie pówinno pisać knigi do bajtlów! Kożdy, wto przimierzo sie kariery bojkopisorza musiołby ta kniga przeczytać! 

Już same imióna bohatyrów sóm udane: Bezlitosno Brygida, Podstympno Petra, Kajka Kurzajka, Markotno Kałamarnica (nazwa łokryntu), Kapitan Świrus, Rufus Smrodek... A ich przigody? Niy doś, że barewne i toczónce sie w zawrotnym tympie, to do tego półne absurdalnego humoru. Trocha a la Kacper Niywypał, a że Kacpra uwielbióm, to i tukej miołek wielgo uciycha.

Do tego wszyskie te łokrynty widma, tajymnicze mapy, wyspy ze skarbami, niybezpieczne portowe tawerny, pofyrtane papagaje... - czego sam niy ma! Cołki piracki świot w jednyj knidze. 

Naprowdy, to jedna z nojlepszych i nojbardzij udanych knig, jakie łostatnio czytołek. Polecóm kożdymu!