« Batman

Biblia dlo łodważnych

Jak czowiek przijedzie nazot ze Źymi Śwjyntyj (a bół żech tam niydowno), to potym durch łó nij myśli.

Cosik durch go cióngnie w te rejóny, klimaty, mjyjsca.

Teleportować sie tam (póki co?) niy do, ale łod czego mómy knigi, filmy abo roztómajte prasowe artikle.

I tak żech sie nawet zastanawioł, czy niy polecić Wóm sam jakij żydowskij bojki abo izraelskij baśni, a tu naroz, na moim biurku w robocie lóndujóm dwie knigi dlo bajtlów wydane niydowno przez Edycjo św. Pawła. Tytuły majóm takie: "Biblia. Historie łodważnych kobjyt" i "Biblia. Historie łodważnych mynżczyzn".

Kożdy z nos wjy, jak mniyj wjyncyj wyglóndajóm spółczesne biblijki dlo dzieci. Przistympnie naszkryflany tekst, streszczajóncy nojważniyjsze łopowieści ze Starego i Nowego Testamyntu + fajniste ilustracje, dziynki kierym takie ksiónżeczki idzie tyż ino kartkować, bez czytanio.

Niy ukrywóm, tyż mi sie to czasami zdarzo, bo fajnie tak popaczeć na biblijne zdarzynia, postacie, czy pyjzaże - szczególnie, jak łosoba ilustrujónco mo talynt. Tukej talynt jes i chocioż knig tych niy wydoł Disney, to rysownik, Gustavo Mazali, ywidyntnie wzorowoł sie na disneyowskij, klasycznyj krysce.

Myśla, że bajtlóm taki styl rysowanio sie spodobo, a i dorosłe bydóm miały co spóminać, bo przeca, tak po prowdzie, to "wszyscy my z Disneya" :)

Tukej możecie sie łobejrzeć, jak tyn cołki Mazali maluje, a jo miołekm do Wos jedyn kómplecik tych knig ("Biblia. Historie łodważnych kobjyt" + "Biblia. Historie łodważnych mynżczyzn"). Zadanie kónkursowe bóło nastympujónce: poślijcie mi dwa biblijne cytaty: w jednym mo być cosik ło waszyj ulubiónyj bohatyrce ze Starego Tystamyntu, a w drugim, ło Waszym ulubiónym biblijnym bohatyrze (tyż ze Starego Tystamyntu). Nagroda dostowo:

Magdalyna Dobrzańsko z Bochni

Gratuluja i zarozki leca do działu wysyłek, coby roz-dwa posłali te knigi pocztóm.

© Copyright 2010; Bojkoblog. Wszelkie prawa zastrzeżone.
Skórka: Wakacyjnie | Korzystając z serwisów wiara.pl akceptujesz warunki regulaminu.
Znalazłeś treści naruszające regulamin? Powiadom nas!

 

| załóż konto i pisz bloga

zgłoś błąd