« Kinofilok Biblia dlo łodważnych »

Batman

Tyn mój pjyrszy - łobejrzany w tyskim kinie Andrómeda, na samym poczóntku lot '90.

Pjyrszy film, na kierym był żech w kinie sóm. Jedna z tych hollywoodzkich bojek nad bojkami, kiero mało co może przebić. Bohatyr dzieciyncyj wyłobraźni. Jak D'Artagnan, Winnetou, Indiana Jónes, abo Robin Hood...

A potym? Potym wracoł nazot. Już nigdy na takim poziómie, jak we filmie Tima Burtóna z 1989 roku, ale pora razy było blisko. Chociożby w kupiónym na studiach kómiksie EGO Darwyna Cooke'a, abo (cołkiym niydowno), we filmie SUICIDE SQUADE. Niy jest to arcydzieło kina, ale te scyny z Jokerym, Harley Quinn, czy samym Batmanym sóm tam cołkiym-cołkiym.

Tak samo i ZABÓJCZY ŻART, kiery łostatnio wziół żech sie z wypożyczalni. Kaś pół roku tymu puszczali to u nos w kinach. Trocha żech sie tego boł, bo: "kryska choby z Cartoon Network, to co to byda paczoł"? Ale jak żech już popaczoł, to widza, że niy ma nojgorzij.

Kónwyncja cołkiym ciykawo (ywidyntnie gangsterskie klimaty), a i fabuła kupy sie czimie.

Kómisorz Gordón i jego cera, Barbara (jako Batgirl) na drugim planie naprowdy dowajóm rady, a zaś dziynki retrospekcjóm mogymy sie dowiedzieć, jak to z tym Jokerym i Red Hoodym było.

W sumie: bardzo solidno produkcjo i do tego tako bardzij do dorosłych niż do bajtlów. 

We filmwebowyj, punktowyj skali dowóm 8/10.

*

Tak sie skłodo, że ta notka napisołek w Dziyń Jynzyka Łojczystego. Dó mie jes to jynzyk ślónski. Wjyncyj ło tym Dniu poczytocie sie na Wiara.pl we "Ślónskich klimatach". Styknie kliknóńć tukej

© Copyright 2010; Bojkoblog. Wszelkie prawa zastrzeżone.
Skórka: Wakacyjnie | Korzystając z serwisów wiara.pl akceptujesz warunki regulaminu.
Znalazłeś treści naruszające regulamin? Powiadom nas!

 

| załóż konto i pisz bloga

zgłoś błąd