« Jak tam, grudniorze? Kinofilok »

Ućycha

Wto by to pómyśloł, że w takij prostyj bojce do dzieci, tyla jes nawiónzań i łodwołań do historii kina...

Downo, downo tymu, we śwjynta, paczołek za bajtla na bojki Disneya w tv. W tym roku tyż tak zrobiłek.

Tako mało tradycjo. I w sumie to może lepszo łóna, łod paczynio na wszyskie te Keviny, "Szklane pułapki" i inksze "Potopy" :)

Już niy pamjyntóm, co to był za kanał (chyba Puls 2), ale lecioł tam animówany film "Mickey: Bajkowe śwjynta". Czi nowelki, kierych bohatyrami sóm myszka Mickey, pies bojkPluto, kaczor Dónald, abo Goofy.

Trocha sie bołek, że to niy bydzie dó mie (bo kaj taki stary kóń, jak jo, bydzie paczoł na bojki do dzieci), ale łokozało sie, że miołek przi tym kupa prowdziwyj, kinofilskij ućychy.

Po jakiymu? A bo widzicie, jak żech tak paczoł na tyn film, kapnół żech sie, że chocioż Amerykóny zrobiły go w 1999 roku, to, tak po prowdzie, kaś tam w tle, cołki czos czujymy poczóntki kina. Bo przeca paczymy na postacie, kiere szłoby nazwać kinowymi archetypami.

Dyć tyn Goofy, to chopek choby żywcym wycióngniynty z downyj, niymyj kómedii burleskowyj. Taki animówany Harold Llloyd na przikłod, w kierego potym wcieloł sie Peter Sellers, jak groł inspektora Clouseau.

A Mickey i te jego problymy z pinióndzami? No przeca to samo przeżywoł Chaplin w swoich niyby-kómediach (niby, bo udowało mu sie je łónczyć z póważniyjszymi wóntkami społecznymi i w tyj bojce jes trocha podobno sytuacja bo i Mickey, i Goofy pómogajóm roztómajtym bjydokóm).

A tyn cołki Pete (szwarccharakter) - czy niy wyglóndo przipadkiym choby te policajty z czornobiołych, niymych filmów, kaj godało sie na nich Keystone Cops?

Myszka Mickey pjyrszy roz pokozała sie na ykranach w 1928 roku. I coś z tamtych lot w nij (i inkszych, klasycznych, disneyowskich bohatyrach) łostało do dzisiej.

Heh, nawet tako typowo, jazzowo (jazz-byndowo!) muzyka w "Mickey: Bajkowe śwjynta" sie pojawio.

Wto by to pómyśloł, że w takij prostyj bojce do dzieci, tyla jes nawiónzań i łodwołań do historii kina...  

© Copyright 2010; Bojkoblog. Wszelkie prawa zastrzeżone.
Skórka: Wakacyjnie | Korzystając z serwisów wiara.pl akceptujesz warunki regulaminu.
Znalazłeś treści naruszające regulamin? Powiadom nas!

 

| załóż konto i pisz bloga

zgłoś błąd