Dzisioj małe có niyco ło bojkach z Dzikigo Zachodu.

Namnóżyło sie nóm zaś łostatnio westernów w kinach i na DVD.

Niydugo na ykrany trefić mo nowo wersjo "Siydmiu spaniałych", a łostanio fany Dzikigo Zachodu mógły łobejrzeć na przikłod takie tytuły, jak "Slow West", "Zjawa", "Śmierć w Tombstone", "Bone Tomahawk", "Niynawistno ósymka", "Niypokónano Jane"... Jo żech sie skusił na tyn łostatni. Ino czymu pisza ło tym na Bojkoblogu?

A bo przeca westerny to w dużyj mierze tyż bojki. To co te wszyskie szpece i machry z Hollywood nawymyślały na tymat Dzikigo Zachodu, to sie wjynkszości historyków w gowach niy mjyści.

Ani tam tyla banków niy narabowali, ani tyż tyla ludzi niy pozabijali, ani te ichniyjsze szeryfy takie dzielne niy były, a ło szlachetności Indianerów tyż niy wjym, czy do sie wiela pedzieć. Nawet pistółle niy były takie popularne, jak to nóm sie zdować może (w niykierych miastach prawo zakozywało ich noszynio abo posiodanio).

Mitów i cygaństw we westernach jes może nawet wjyncyj niż w niyjednyj bojce braci Grimm. No ale, że jo lubia bojki, to lubia tyż westerny.

Zresztóm tyn ło niypokónanyj Jane (tytuł łoryginalny: "Jane got a gun"), w kiero wciylo sie Natalie Portman, zaczyno sie nawet bojkóm. Matka godo córce ło łodwrócónym dżewie (wto ino wlezie do jego pnia, zarozki zmjynio sie w dobrego czowieka).

Ale to ino bojka. We filmie bohatyrka zmago sie raczyj z złymi ludziami. Nojgorszy z nich jes Bishop (zaskakujónco rola Ewana McGregora - chyba pjyrszy roz widza go jako szwarccharaktera). W sumie szłoby pedzieć, że zastympuje sam smoka abo czornoksinżnika :)

Potym we fabule bydzie już coroz bardzij póważnij, ale zaś jak paczołek na te wszyskie fortele i to, co bohatyry kómbinujóm, coby pózbyć sie bandy Bishopa, to musza Wóm pedzieć, że tyż przipóminały mi ryalita baśni. Spryt, pómysłowoś, gowa ni łod parady... I ta dytytrminacjo, coby ni dać sie złu. A może nawet Złu?

Tak jak bojki, tak i westerny, majóm coś z przipowieści. Uniwersalnych, krzepjóncych, łobleczónych w pjykny kostjum - i cołki czos aktualnych.

Takie kino to ja. To jo polecóm. Warto.