Phileas Fogg zaś rajzuje po świecie.

Byłżech w weekynd na prymierze sztuki W 80 DNI DOOKOŁA ŚWIATA.

Wystawił jóm nasz katowicki Tyatr Ślónski, ryżysyrowoł sóm Herr Direktor Talarczyk :) a scynariusz (na podstawie słynnyj pówieści Juliusza Verne'a) napisoł Robert Górski. Ja, ja - tyn sóm Górski, co tyla wyrobio w Kabarecie Móralnego Niypokoju.

No i musza Wóm pedzieć, że chocioż jes to przedstawjynie do modych widzów, to duch tego kabaretu durch unosi sie na scynie, beztóż i dorosłe widze majóm na co paczeć, a czasym bawióm sie może na tyj sztuce i lepij łod bajtlów.

Dużo absurdalnego humoru (trocha a la Mónty Pythón), ale i dużo naprowdy fajnistych piosynek. Praktycznie szło by pedzieć, że jes to musical (jak pedziała mojo narzecóno: bardzo przipómino filmowo AKADYMIA PANA KLEKSA).

Co do łobsady to sóm tukej dwa gwiazdory, kiery błyszczóm i dowajóm na scynie ze siebie wszysko. Bartłómiej Błaszczyński jako Passepartout ywidyntnie wzoruje sie na Górskim (gro i rycy, jak łón), a już to co pocho Dariusz Chojnacki jako inspektor Fix, przełazi ludzkie pojyńcie. Łodstawio jakosi sztywno-wściekło psio pantómima, kiero idyalnie pokozuje czowieka zawziyntego i jak Fix... zafixowanego :)

Szkoda, że idóm wakacje i ta pjykno, kolorowo i wesoło sztuka w nojbliższym czasie niy bydzie u nos grano. Ale we wrześniu na bank poleca na to jeszcze roz. Coś czuja, że Tyatr Ślónski bydzie to groł przez nastympne 25 lot abo i dużij.

Co tukej jeszcze wjyncyj pisać... Hit!

*

Małe có niyco ło tyj sztuce możecie sie łobejrzeć na Youtube. Video wciepuja Wóm póniżyj. Jak niy chcecie paczeć na cały tyn magazyn, to przeskoczcie na 21 minuta. Pó nij zacznie sie materiał ło przedstawjyniu W 80 DNI DOOKOŁA ŚWIATA: