Ale móm łóstatnio szczyńście do tego patróna.

A to trefia go w Bytómiu, a to na kartach nowyj, kapitalnyj powieści historycznyj, a terozki zaś w ksiónżeczce do dzieci wydanyj przez, nómyn-ómyn, wydownictwo Śwjynty Wojciech :) Widać upómino sie ło pamjyńć tyn wielki, czeski śwjynty, a że jo, tak po prowdzie, jesżech z tych Ślónzoków, co to nojbliżyj myntalnie i kulturowo majóm do Czechów, to i móm z tych jego "łobjawjyń" w moim życiu naprowdy wielko uciecha i chyntnie wgryzóm sie w jego bigrafio i legyndy łó nim.

W publikacji "Święty Wojciech. Śladami pierwszego patrona Polski" nojbardzij podobo mi sie wóntek z Urbanym Thelen, z kierego wyniko, że to nasz śwjynty Czech pojednoł po II wojnie światowyj Niymców z Polokami (tukej możecie sie przeczytać, co na tyn tymat pisało Deutsche Welle).

No wto by to pómyśloł? Ale w sumie... Do patróna duchowyj jedności Europy takie coś przeca pasuje, pra?

Fajno jes tyż forma tyj ksiónżecki-bojecki. Lóngina Cywińsko i Maria Frela wymyśliły sie, że napiszóm jóm we formie wakacyjnyj łopowieści, w czasie kieryj rodzice z bajtlami zwiedzajóm roztómajte mjysca zwiónzane ze śwjyntym Wojciechym i przibliżajóm dziecióm postać tego patróna. Praga, Libice, Póznań, Gniezno, Śwjynty Gaj, a nawet Malbork - wszysko tukej mocie.

A na Łoskara, Pulitzera, czy inkszego Nobla zasugujóm ilustracje Elżbiety Kidackij. To jedna z nojzdolniyjszych artystek, jakie znóm i naprowdy, juz same łoglóndanie tego wydownictwa dowo czowiekowi wielko radoś i poczucie choby zaś był bajtlym :)

*

Miołek do Wos czi ygzymplorze tyj ksiónżeczki, a zadanie kónkursowe było takie: pytołek sie, kim dlo śwjyntego Wojciecha był bł. Radzim? To był jego bracik (przirodni). Wjyncyj łó nim poczytocie sie tukej, a nagrody dostowajóm: 

Rozalia Ciupa z Giżycka, Magdalyna Głogowsko ze Zobrzo i Anna Zimoch z Chorzowa

Gratuluja. Poślymy Wóm te knigi pocztóm.