Pytanie do dorosłych: tyż już szkryflocie i kolorujecie? :)

Łostatnio mómy na to wielko moda. Pisoł nawet ło tym jakiś czos tymu "Goś Niydzielny". Tukej mocie tekst Szymóna Babuchowskigo na tyn tymat, kiery zakosiłek dó nos, na Wiara.pl :)

Łodstresowujóm, pómogajóm w kóncyntracji, robióm nos bardzij kryatywnymi, a do tego dowajóm poczucie, choby sie przi niych wypoczyło.

No ja, to wszysko prowda. Niy roz ze sioszczynicóm żech w dóma kolorowoł i dowało mi to naprowdy wielko radoś. Beztóż polecóm wszyskim tako forma spyndzanio wolnego czasu, kiery... idzie tyż pożynić z Bibljóm i modlitwóm.

Niy wierzycie? No to łobejrzijcie sie wydane przez Edycjo Śwjyntego Pawła tómy z cyklu Kolory Biblii. Jedyn z nich to "Radoś" z rysunkami Michal Sparks, a drugi to "Szczyńście" zilustrowane przez Denise Urban.

Łobie te autorki to znane i utalyntowane amerykańskie graficzki. A niy ino jest w ich knigach co kolorować (pjykne kómpozycje i roztómajte esy floresy), ale i poczytać. Bo na kożdyj strónie dostowómy inspirujóncy cytat z psalmu abo jakosi móndroś z inkszyj biblijnyj ksiyngi. I tak idzie sie spotkać z Bogiym, abo doświadczyć "mini-zesłanio" Ducha Śwjyntego.

No tako Nowo Ewangelizacjo to jo rozumia! Jest to jakiś pómys, pra?

*

Miołek do Wos czi kómplety tych kolorowanek, a zadanie kónkursowe bóło takie: mielście mi posłać Wasz ulubióny cytat z Pisma Śwjyntego. Nagrody dostwajóm:

s. Arkadia Napiórkowska z Bisztynka, Zbigniew Hojka z Połomii i Anna Łukoszek z mjyscowości Pawonków

Gratuluja, pakety poślymy Wóm jeszcze w tym tydniu.