Zdarziło sie, zdarziło...

dodane 06:49

Poszoł żech sie z małóm na prymiera ksiónżki.

Waldymar Cichóń - tyn, co już tela fajnistych bojek ło kociku Cukierku naszkryfloł, wzión sie tym razym za ślónskie ryalia i wydoł kniga "Zdarziło sie na Ślonsku. Łopowieści niysamowite niy ino dlo bajtli". W tyn weekynd w Tychach publikacjo ta miała swojo prymiera, a że i jo w Tychach (póki co) jeszcze mjyszkóm, to żech sie tam kopnół ze sioszczynicóm.

- Może tam jóm przekónajóm, że czytanie jes fajne. A niy ino tyn Youtube i Youtube... - myślołek sie, jak żech tam z nióm szoł.

Sama kniga jes naprowdy pómysłowo i udano. Możecie sie w ni na przikłod poczytać ło tym, jak Pónbóczek Ślónzokóm Ślónsk podarowoł, jak Ślónzoki łostały kowbojami na Dzikim Zachodzie, abo tyż ło roztómajtych słynnych Ślónzokach (św. Hyjdli-Jadwidze, Jerzym Kukuczce, czy Karolu Goduli).

Mie sie nojbardzij podobo czyńś (tajla) ło Ezim Wilimowskim - chopie co naszczyloł niyzliczóno masa torów w barwach Ruchu, Polski, Niymiec, czy 1.FC Kattowitz.

No ja, tak to jes. Liga ruszyła, to mi tyż łod razu już ino fusbal we gowie. Zresztóm przeczytejcie sie sami, co Cichóń ło tym naszkryfloł:

"Wiycie, jaki szport je nójbardzij popularny we świocie? Pra, iże fusbal! Wszyskie chopy pszajóm fusbalowym szpilóm! Na Górnym Ślónsku, kaj wielkich manszaftów niy brakuje, fusbal jes jak religio...".

Potwierdzóm. Zgodzo sie - jak godoł tryner Ruchu, śwjyntyj pamjyńci Jerzy Wyrobek. Dó mie tyż fusbal jes jak ryligio. Chocioż łostatnio czyńścij mie idzie trefić na hali, kaj grajóm siatkarki z TKS Tychy. Bo wiadómo, niy ma to jak fajne dziołchy... :)

Dobre, styknie tych gupot na dzisiej. Jo sie już wylogowuja.

Abo niy! Napisza Wóm sam jeszcze trocha ło sioszczynicy.

Niyby cołkie życie dó nij godóm po ślónsku, ale łóna raczyj łodpowiado mi po polsku. No ale jak my tak szli nazot z tyj prómocji knigi do dóm, pado mi tak: - Chopie, no pódź już. Co sie tak smolisz. Póóóódź! :)

Stykło, że wjynkszo grupa dorosłych pogodała trocha po ślónsku, że Cichóń przeczytoł pó naszymy na głos jedyn rozdział swoij knigi i już jóm to łośmieliło do godanio po ślónsku. Szok? Cud? Pierón wjy, ale może co z tego bydzie. Może tyż jóm ślónszczyzna wcióngnie, jak mie...

*  

Miołek do Wos jedyn ygzymplorz knigi "Zdarziło sie na Ślonsku. Łopowieści niysamowite niy ino dlo bajtli". Zadanie kónkursowe bóło takie: jaki słynny krym wynaloz Ślónzok, Oskar Troplowitz? Szło ło Nivea, a nagroda dostowo:

Anna Bucher z Gliwic

Gratuluja, kniga jeszcze dzisioj zaniesa do naszego redakcyjnego punktu wysyłek. Może w tym tydniu do Wos przidzie pocztóm :)

nd pn wt śr cz pt sb

25

26

27

28

29

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

1

2

3

4

5

6

Dzisiaj: 28.03.2024