Gyburstag z... bojkami :)

Mały rycy: - Bi ba bim! (Zygzak McQueen). Abo: - Pan! Mimomki! Pan! (pan to Gru - jedyn z bohatyrów z bojek ło "Miniónkach").

No i chwila potym już gafcy sie. Abo na kómpa, abo na skrzinia (bo "Miniónki" mómy na DVD).

Szkoda, że tak ykranowo. Angielski "watcher" (ślónski "paczer") - tela z niego wyrośnie? Gupiejymy łod tych ykranów. Przimulajóm nos, dorosłych. A co dopiyro bajtlów...  

Z małóm tyż niy lepij. Nojchyntnij by durś paczała Niklausa na Youtube'e.

- O niy! Czytómy jakoś bojka! - staróm sie łodcióngnóć jóm łod neta. Chytóm ze szranku piyrszy lepszy zbiór z baśniami i lygyndami z cołkigo świota i wjyżdżóm na maltańsko bojka ło krainie czech krziwych cytryn.

Mało sie krziwi. Zatyko uszy. Łóna tego suchać niy bydzie. Ale poleku, poleku, zaczyno jóm ta historio intrygować.

Morskie podróże, plaże, pustynie. Króle, wróżki, żebroki... - kiery to już roz móm wrażynie, że dziynki lekturze bojki, łobcuja z jakómsi pradownóm, mitycznóm rzyczywistościóm?

Synnóm? Sakralnóm? Jung to wjy...

W kożdym razie już w "Gilgameszu" to bóło, a potym w tysióncach (miliónach?) nastympnych łopowieści, kierymi ludzkoś łod poczóntku swoigo istniynio żyje.

Z małóm mi sie wczoraj udało TAM dostać. Z małym? Niy bardzo.

Ale niy ma co gupieć. Łóna tyż zaczyła być bardzij "kumato" jak skóńczyła czi latka. Łón jeszcze tyla niy mo. Wszisko przed nami :)

A na kóniec Niklaus: