Poszoł żech sie niydowno do kina na nowy film Davida O. Russella.

Za AMERICAN HUSTLE go wielbia, za PAMIYNTNIK POZYTYWNEGO MYŚLYNIO w sumie tyż, no beztóż musiołek.

Dziyń po syansie sie łokozało, że Jennifer (Dżynifer!) Lawrence za tytułowo rola dostała Złotego Globa - znaczy sie, dodatkowo radocha! :)

Fabuły Wóm za wiela streszczać niy byda (bohatyrka to ta baba, co wynodła/wynalazła mopa), bo przeca to jes Bojkoblog, a niy żodyn Filmoblog. No, ale baśniowe wóntki z tego filmu przibliżyć moga, bo trocha ich jes i ywidyntnie widać, czym O. Russell sie inszpirowoł.

Joy mo zło siostra (na dodatek przirodnio), co łod razu kożdymu pówinno skójarzyć sie z Kopciuszkiym. Zresztóm łóna takim Kopciuszkimy trocha jes (wszyscy sie bawióm, imprezujóm, abo leżóm przed telewizorym, a łóna jedyno loto ze szmatóm, sprzónto, abo naprawio popsute ruły, chocioż mo dwóch chopów w dóma).

Cołkie szczyńście jes tukej tyż jyj óma, kero (choby dobro wróżka, abo matka chrzesno) pómogo ji, podnosi jóm na duchu i durch godo, coby sie niy poddowała.

Potym bydzie jeszcze jedna baba (grano przez Isabella Rossellini), kiero choby Sfinks zadować bydzie ji kolejne pytania i jak na nie Joy łodpowjy, to bydzie mógła "iś dalij". Rozwijać swój biznes, w kierym niyjednego "dracha" pokónać bydzie musiała.

Podobo mi sie tyn film. To że ryżyser bawii sie ónirycznóm póetykóm, co chwila próbuje wykryować magiczny nastrój.

Może niy jes to aż tako bómba jak AMERICAN HUSTLE, ale wiela mu niy brakło do filmwebowego 10/10 łody mie.

To tela + magická ukázka na kóniec: