Co by to było, jakby tak szło sie cofnóńć nazot do dziewjytnostego wieku?

Póki co, mogymy sie ło tym ino pómarzyć. Abo poczytać. Na przikłod w wydanyj niydowno ksiónżeczce do bajtlów "Zaginione perły księżnej Daisy".

Sześ małych gizdów pómogo sam rozwiónzać zagadka znikniyńcio naszyjnika słynnyj ksiynżnyj Daisy, a mode czytelniczki i czytelniki majóm łokazjo podowiadywać sie tyż trocha rzecy ło downych pszczyńskich pónach i grofach.

Wjyncyj wóm niy zdradza, bo i niby czymu miołbych Wos szterować i godać Wóm, wto tukej jes tyn zły i czymu akurat napochoł to, co napochoł. Tego dowjycie sie ze knigi autorstwa Móniki Kassner - wielkij regiónalistki, kiero lata już prómuje ślónskoś i z roku na rok idzie ji to coroz lepij.

Terozki udało sie ji naszkryflać pjyrszy tómik, łotwiyrajóncy nowo syria wydowniczo do bajtlów (tzw. syria z bómbónym) i licza na to, że już niydugo byda móg Wóm prezyntować na Bojkoblogu kolejne ksiónżeczki z tego cyklu.

W "Zaginiónych perłach..." podobo mi sie niy ino fabuła (ślónskie jankesy z Bullerbyn na dworze ksiyncio pszczyńskigo :) ), ale tyż na przikłod ilustracje. Kojarzóm mi sie łóne z prostymi, ale szykownymi malunkami z przedwojynnych kómiksów, abo z knigi "Bery śmieszne i ucieszne", w kieryj Dorota Simónides pozbiyrała nojfajniyjsze ślónskie wice.

Jes sam tyż trocha zagadek, rebusów, a nawet mini-słówniczek ślónsko-polski, bo przeca niykiere bohatyry godajóm tukej ino po ślónsku.

Polecóm Wóm tyn book!

*

Miołek tyż do Wos mini-kónkurs, w kierym do wygranio bół ygzymplorz "Zaginiónych perłów ksiynżnyj Daisy" + pendrive (pyndrajw!) z logo Wiara.pl. Pytanie kónkursowe ciepnół żech Wóm takie: w kierym roku urodziła sie ksiynżno Daisy? Łodpowiedź: w 1873.

Nagroda dostowo:

Bożyna Wilczek-Twardy ze Świyntochowic

Gratuluja, jeszcze dzisioj poślymy jóm pocztóm.