Niych moc bydzie z Wami :)

No i sie zaczyło. Łod weekyndu mómy w naszych kinach nowo czyńś STAR WARS. Jo żech filmu jeszcze niy widzioł, ale za to czytołek fajnisty tekst ło cołkij tyj syrii (abo uniwersum - jak to sie czynsto godo).

Polecóm Wóm artikel Wojciecha Brzezińskigo "Gwiezdne mity", kiery ukozoł sie w śwjóntecznym "Tygodniku Powszechnym". Tyn autor pisze sam ło mitach, bojkach, lygyndach... - wszyskim tym, z czego korzystoł Lucas, jak ukłodoł scynariusz "Gwiezdnych wojyn".

Nojbardzij inspirowoł sie Josephym Campbellym i jego knigóm BOHATYR ŁO TYSIÓNCY GYMB (tytuł łorginału: "The Hero with a Thousand Faces").

Campbell "wydestylowoł w nij z mitów cołkigo śwjota jedna historio, jedno dróga, kiero musi przelyź bohatyr. Mónmit, kierego łodbiciami sóm inksze mity" - pisze Brzeziński i dodowo, że ta sama dróga "kiedyś pokónywali Gilgamesz, król Artur, Budda - a tukej podónżoł nióm modrołoki synecek z farmy, kiery godo z amerykóńskim akcyntym".

Hómer, Szekspir, Herkules, ale tyż MATRIX, abo Harry Potter. I łó nich poczytocie sie w "Gwiezdnych mitach" - tekscie, kiery Wóm polecóm. Bo tyn nowy film, to może być ino larmo, szczylanie i zgrzitanie zymbami (pónoć pod sóm kóniec robi sie naprowdy dołujónco).

Ale wjyncyj Wóm już tukej szkryflać niy byda. Łobejrzijcie sie to sami. Abo łosmólcie to - jak tam wolicie.

Jo sie chyba do kina jednak kopna :)