Thorgal i inksze bohatyry z jego świota majóm sie dobrze. Niydowno zaś żech tefił na jedyn nowy album. Tym razym ło jakysi Kriss.

Niy byda udowoł wielkigo ekszperta łod tyj kómiksowyj sagi. Czytoł żech to trocha za bajtla, czasym sie tam do tego nazot wracóm (niydowny, łorjyntalny album KAH-ANIEL uważóm nawet za kultowy), ale na przikłod z takim autorym bloga thorgalverse.blogspot.com równać sie niy moga. Beztóż ta notka to bydzie ino tako impresjo :)

Głównóm bohatyrkóm jes sam Kriss de Valnor, kiero (z tego co piszóm na pl.thorgal.wikia.com/wiki/Thorgal_Wiki), pokozała sie w dziesiyńciu "Thorgalach", a niydowno mo tyż swojo boczno syria i "Wyspa zaginiónych bajtlów" jes szóstóm czyńścióm jyj solo-przigód.

Jes to królowo-wojowniczka, co to chce zebrać wielgo armia i uwolnić swoigo syna, ale - jak widzymy w kómiksie - trefjyła na tajymniczo wyspa, z kieryj niy bardzo idzie sie dostać aus.

Tak żech sie przeglóndoł tyn tóm i powjym wóm, że miołek nawet mały wehikuł czasu. Kule bele, chobych sie cofnół ło ćwiyrć wieku do szkolnyj bibliotyki, z kieryj żech sie pożycoł pjyrsze Thorgale :)

Tamte były dziełym duentu Rosiński - Van Hamme. Tyn, kierego Wóm sam rycynzuja to już zasuga tria Surżynko - Dorison - Mariolle. Ale widzicie, aura, atmosfera jes ta samo. Lygyndy ło bebokach i potworach ze Jezioromorza, godoanie ło bogach Wikingów, abo ło Umai (tajymniczyj mocy/istocie, kiero może sie kójarzyć z AVATARYM).

Podobo mi sie ta kónwycja fantasy, w keryj jest to pisane i szkryflane (fantasy to nic inkszego, jak bojki do dorosłych). Zwroty akcji tyż sóm tukej co chwila takie, że durch chytocie sie za gowa i rycycie sami do siebie: - Że co?!

Co tukej dużo godać: udano to czyńś i już wjym, że na Dziecióntko chca pjyńć póprzednich albumów z przigodami Kriss de Valnor.

Bohatyrki to jes to! A niy ino chopy, chopy, chopy...

To pisołek jo - synek ze Ślónska, kaj matriarchat durch jes silniyjszy, jak patriarchat :)