Na DVD idzie już łobejrzeć "Skyrety morza" - jedna z tych bojek, kiero kochajóm niy ino bajtle.

Dorosłe widze (a nawet i krytyki), tyż godajóm, że cosik sie sam wyjóntkowo udało. Wyczyn! - jakby to pedzioł Zygmunt Kałużyński.

Film bół w tym roku nawet nóminówany do Łoskara. No w sumie to niy ma sie co dziwić. Downo takij produkcje na ykranach kin niy bóło.

Irlandczyki pómysłowo posplotali tukej wóntki z roztómajtych ich mitów, baśni i bojek (charakterystyczno ludowo, cyltycko muzyka w tle tyż jes), ale zaś, jak idzie ło styl graficzny, to zanimowali to nowocześnie. Elegancko i stylowo. Choby chcieli łożywić te wysmakowane ilustracje z NEW YORKERA abo downego PRZEKROJU.

Podobo mi sie tyż, że jes tukej trocha wóntków z psychologie. Niykiere twórce tak lukrujóm swoje animacje, że ło głymbi psychologicznyj (kiero w bojkach jes przeca pierzyńsko ważno) mogymy zapómnieć. Serwujóm nóm ino róż und kicz. Tukej jes inaczyj.

W jednyj scynie widzymy na przikłod pozawjyrane w krauzach uczuciach. A cza je przeca czaszym puścić, wyciepnóć ze siebie. A niy ino durch sie kryć z nimi i tłamsic je. W inkszyj móm zaś tunel, kiery prówadzi do świata ludzi. Kożdy z nos by sie musioł czasym taki wykopać (szczególnie jak mo faza na samota i zaczyno już aspółecznie dziczeć).

Móndro to bojka, a i fajniście zrobióno, beztóż polecóm. A póniżyj (tako nowo, bojkoblogowo tradycjo), dowóm Wóm video-rycynzjo Sfilmowanych. Streszczajóm fabuła. Jo żech sie to tym razym podarowoł :)