Heh... Takigo kalyndorza żeście jeszcze niy mieli :)

Niy wiym wto to w tym WAM-ie wymyślół, ale trefił idyalnie. Podyjrzywóm, że św. Oburz patrónym Polski jes już downo, ale dopiyro terozki póstanowił sie nóm ukozać.

Jego łojcym/autorym jes Marcin Wicha, kierego może nawet znocie, bo pora knigów dlo bajtlów już napisoł, ale terozki - jak to sie godo - pojechoł po bandzie.

W kómiksowym stylu pokoże Wóm m.in. wynalezióny bez niego oburzómetr, zgrómadzóno kolekcja kamjyni łobrazy, a na kóńcu dowjycie sie, że cołki tyn kalyndorz jes w sumie na nic, bo to jedna wielgo gupota i wyciepane pinióndze!

Apeluje tyż: łogrzywejcie chałpy oburzyniym; zawdy popjyrejcie krajowe oburzynie i w ogóle zróbcie miszczostwa świata w oburzyniu! Tako rzecze śwjynty Oburz :)

Pisza łó nim sam na Bojkoblogu, chocioż to, co Oburz wyrobio na kartach tego kalyndorza wyglóndo niy tyla na bojka, co na jakoś antybojka. No ja, ale zaś te kómiksowe kadry i rysowane wice pod bojki i animacje trocha pasujóm.

Beztóż informuja, że tako pozycjo sie na rynku pokozała (sam mocie nawet próbka w pdf-ie tego, co tyn Oburz pocho). Idzie jóm kupić na przikłod tukej

Miołek dlo Wos tyż kónkurs, w kierym mieliście mi naszkryflać, co Wos wkurzo i oburzo :) Kalyndorze dostowajóm:

Anna Zielińsko z Wrocławia, Celina Spałek z Tarnowskich Gór i Richard Flakus z Katowic

Gratuluja. Jeszcze dzisioj Wóm je wyślymy.