Jak żech ino w Ympiku łoboczył, że Bellóna wydowo takie knigi, zarozki żech wiedzioł, że cosik sie do dóm z tyj syrii przitaskóm.

Wzión żech sie "Króla Artura i Rycyrzy Łokróngłego Stołu" U. Waldo Cutlera. Pómyślołek sie: - No, terozki jes czos, coby sie w to porzóndnie wczytać.

No i powjym Wóm, że czytało mi sie to nawet, nawet. Atmosfera jes sam łodrealnióno. Te wszyskie pustelniki, ksiynżniczki abo wrogie rycyrze pokozujóm sie bohatyróm naroz (niy bardzo wiadómo skónd). Choby w jakim śnie... 

Baśniowo-łóniryczne to to jes. Aura naprowdy staroangielsko (Robin Hood sie przipómino). Jedyne czego szkoda, to że celtyckość kaś sie tukej straciła.

Jak tak posznupiecie po knigach z mitami, abo po leksykónach, w kierych piszóm ło ich bohatyrach, widzicie tyn cudny świot celtyckich bojek, kiery dzisioj czynsto łobjawio sie zaś w knigach z gatunku fantasy.

Tako Morgana abo Merlin na przikłod. No dyć jak czowiek sie wczyto w roztómajte łopowieści łó nich, to mo wrażynie, że bijóm na gowa wszyskie te śpiónce królewny, Śniyżki i inksze Kapturki. Głymbsze te ich dziejiny sóm. Bardzij mistyczne. Tajymnicze...

W wydanyj bez Bellóna knidze tego niy ma. Wjyncyj tukej rzykanio, Mszy śwjyntych, pokut i modłów chrześcijańskich. Niby fajnie, ino że podskórnie czuje sie, że to jakoś dydaktyka. Że cosik sie z tych historii (tajymnygo, pogańskigo) powyciepowało. 

Jak godóm: aura, atmosfera jes. "Celtycko mistyczno mgła" spowijo stróny tyj knigi. Ino pożyniynie tego ze chrześcijaństwym niy poszło nojlepij. Chocioż sóm wyjóntki.

Jak wjymy przi narodzinach Jyzusa łobecne sóm czi króle. A tukej, przi śmierci Artura, pokożóm sie czi królowe. Pjyknie łobrócóny motyw!

P.S.
Niykierzy, jak widzóm, że pisza "Jyzus", a niy "Jezus", to sie szkrobióm po gowie i pytajóm, czy naprowdy tak słysza/godóm po ślónsku Jego imie?

Ja. Tak bych to pisoł. Zresztóm niy ino jo. Przeca i Zbigniew Kadłubek w gynialnych "Listach ze Rzymu" szkryfloł: "I oszalołbych, jak bych bez cufal zapomnioł o Ywangelji i tych słowach Jyzusa, kaj godoł o policzonych na gowje wosach".

Czechy godajóm Jeżisz, Meksykóny Hesus, a Ślónzoki Jyzus. Kóniec. Kropka :)