Mały bajtel sucho dziadkowych lygynd, a że tyn jego ółpa robiół na grubie, to godo mu ło Skarbniku i jego podziymnyj, zacarowanyj krainie.

Czytołek łostatnio kniga KINO ŚLÓNSKIE (autor Jan F. Lewandowski). Kapitalny przewodnik po wszyskich filmach, kiere sóm mi szczygólnie bliskie. 

Kutz, Kidawa, Pieprzyca... - wjynkszoś ich dzieł znóm, ale były i niyspodzianki. Na przikłod "Okrągły tydzień" z 1977 roku w ryżysyrii Kijańskigo.

Kutz napisoł do tego dialogi, Albin Siykiyrski scynariusz, a na ykranie szło łobejrzeć mjyndzy inkszymi Francika Pieczki i małego Arkadiusza Jakubika. Ja, ja, tego, co to terozki we filmach Smarzowskigo robi furrora. Tukej zaczynoł! :)

Niy widziołek tego filmu. Nawet za bajtla, w PRL-owskij telewizji niy było mi dane. Ale może kiedy go zaś puszczóm. Na Kino Polska abo w TVP Kultura? Z łopisu Lewandowskigo wyniko, że to fest "bojkoblogowo" produkcjo.

Mały bajtel sucho dziadkowych lygynd, a że tyn jego ółpa robiół na grubie, to godo mu ło Skarbniku i jego podziymnyj, zacarowanyj krainie.

Bajtlowi potym w nocy śnióm sie roztómajte rzecy, kiere słyszoł za dnia. Musi na przikłod pómóc ratować królewna, kiero wjyńzi smok. "Realizm miesza się z baśniowością, a jawa ze snem" - czytóm w "Kinie ślónskim" (wydoł je katowicki Ślónsk w 2012).

Czy to jes dobry film? Pónoć niy. Sóm Jakubik godo, że... A zresztóm przeczytejcie sie sami, co łóni tam na planie i na ykranie wyrobiali :) Tukej mocie link do wywiadu.

No ale trocha tego pjyknego, downego Ślónska tam jes. Hołdy, szkaciorze, miłoś do gruby, kiero jak majóm zawrić, to ludzióm sie zdowo, choby umiyroł wtoś bliski... I takie kóncki tam znojdziecie.

Niy ma co. Cza cichtować na tyn film, a jak go zaś kiedy na jakim kanale puszczóm - łobejrzeć i wyrobić sie swojo własno łopinio.

P.S.
Jutro żech jes łostatniy dziyń w robocie. Potym pónad czi tydnie urlopu. Beztóż w siyrpniu na Bojkoblogu bydzie pustawo.

Nastympny wpis? Jak dożyja, to kajś po 23 VIII :)