No niby nic. Ale jak sie łobejrzycie film łó nim (tyn klasyk z 1947 roku), to cosik Wóm w gowie zaświtać może.

Co? No przeca to ta sama kónwyncjo, co w starych filmach biblijnych. 

"Dawid i Goliat", "Dawid i Batszeba", "Historia Ruth", "Salómón i kólowo Saby"... - podobne kostiumy, dekoracje, styl granio aktorów.

Tymatyka - wiadómo - inkszo. We "Sindbadzie żeglorzu" (w kierego wcielo sie tukej Douglas Fairbanks Jr.) jes tyż wjyncyj humoru niż w downych, hollywoodzki produkcjach, łopartych na Starym i Nowym Tystamyncie. Ale wrażynie, retro-atmosfera, przijymnoś paczynio - ta samo, co przi biblijniokach.

Heh, dyć sam nawet Maureen O'Hara (grajónco ksiynżniczka i ukochano Sindbada) przipómino Rita Hayworth kiero przeca stworzyła niyzapómniano kryacjo jako Salóme. 

Jes tyż mody Anthony Quinn! Tukej gro Ymira, ale wiadómo - jak na niego pacza, zarozki widza Barabasza.  Tyż tak mocie? :)

Fabuła nawet mo rynce i nogi. Bohatyry chcóm sie dostać na bajeczno, półno skarbów, Wyspa Aleksandra Wielkigo. Nim im sie to udo, przeżywajóm dziesióntki roztómajtych przigód, a nawet jak jes spokój, to spóminajóm inksze, wcześniyjsze przigody, kierych na ykranie my niy widzieli.

Na przikłod godajóm sie ło gigantycznym ptoku Ruchu, zaklyńciu Alladyna, dżinie, cyklopie (kierymu Sindbad wyduboł łoko), czy igraniu z morskimi, mitycznymi stworzyniami. 

Pokozany sam Łorjynt wyglóndo może sztucznie i tyatralnie (jedne wielgie atelier), ale swój urok mo.

A i aktualnie jes mómyntami. Choby wtedy, jak Quinn godo, że jes wojokiym Allaha i że jak dokónuje zniszczyń, to uczy pokory. Dzisioj to samo godajóm pewnie terorysty z Państwa Islamskigo. 

Niywesoły akcynt na kóniec tyj notki...