Radoś, smutek, lynk, gniyw, łodraza - dowjycie sie tukej wszyskigo ło tych ymocjach.

Na bojka "W gowie sie niy mieści" zaproszoł żech Wos już zeszły tydziyń na wiarowym syrwisie Kultura (kónkretnie tukej), beztóż dzisioj, na Bojkoblogu, niy byda rycynzowoł filmu, ino poleca Wóm cosik inkszego.

Wiadómo, jak Disney puszczo do kin nowo produkcjo, to zarozki w ksiyngarniach i gyszeftach dlo bajtli mómy prowdziwy wysyp ksiónżeczek, maskotek i kiczowatych carów, rujnujóncych kapsy łojców, matek, ujków i inkszych człónków rodziny :)

Terozki tyż tak jes, ino że niy do kóńca. Bo przeca to bojka psychologiczno, tumaczónco bajtlóm (a i dorosłym tyż), co to sóm ymocje, po co sóm, jak sie z nimi radzić... To i towarzyszónce ji gadżety sóm trocha inksze. Móndżyjsze. Bardzij wartościowe.

Polecóm Wóm zwłaszcza ni to ksiónżeczka, ni to notes "Moje nastroje". Radoś, smutek, lynk, gniyw, łodraza - dowjycie sie tukej wszyskigo ło tych ymocjach.

Wiadómo, kożdy chciołby być durch happy, ale - jak czytómy w tyj publikacje - smuta tyż jes poczebno (pomogo nóm dać sie rady z problymami, skóncyntrować sie na nich i porzóndnie je przemyśleć, przetrowić).

To samo lynk (jak ino niy pozwolymy mu na to, coby nos sparaliżowoł, może nos mobilizować do roboty. Abo chrónić przed roztómajtymi pierziństwami, bo działo jak sygnał alarmowy). No i gniyw (łokropny jes, to prowda. Ale tyż dowo nóm znać, że cosik jes niy richtig).

Wygupy? Pasje? Rodzina? Kamraty? Ło tym jak sóm ważne, tyż poczytocie w tyj mini-knidze, kiero niy ino sie czyto, ale i uzupełnio, szkryflo w nij, wpisuje swoje przemyślynia, łodkrycia... To tako pjyrszo, psychologiczno autoanaliza.

Sóm widziołek jak po syansie w kinie mojo sioszczynica zaczyła myśleć, czymu akurat terozki czuje to, co czuje. Czymu sie nerwuje, abo nudzi, zamias być radosno i szczyńśliwo? I za chwila już happy była. A jo to samo.

Znerwowoł żech sie czymś, łóna sie na mie paczy, że niyby "Co jes, ujek?". I za chwila sie z tego chichrómy, bo to ino tyn czyrwóny Gniyw przejół w moij gowie kóntrola. A niypoczebie :)

Naprowdy, fajnie roztómajte zgrzyty idzie dziynki "W gowie sie niy mieści" rozładować. Kupa móndrych rzeczy z filmu i ksiónżeczek dowiedzieć.

Polecóm!