Królewicz Marko - za życio niyby tako sie postać. Żodyn wielki wojok, władca, bohatyr...

Ale po tym, jak go ubili w bitwie na Rowinie (rok 1395), jakimsi cudym zmartwychwstoł. Ja ja, jo wjym, ino w ludowych łopowieściach, no ale to i tak pjykne zmartwychwstanie, pra? Pó nim przeca stoł sie nojwjynkszym bohatyrym w dziejach Syrbii, a może i cołkij Słówiańszczyzny...

Łostatnio czynsto sie natykóm na roztómajte spóminki łó nim. A to przi yposach Europy czytóm wzmainka ło ypickich, ludowych, syrbskich pieśniach. A to przi knidze ło wierzyniach Słówian dowo sie go za przikłod słówiańskigo herosa. A to zaś kartkuja zbiór bojek z cołkigo świota i tam tyż widza baśń abo legynda łó nim...

No to żech sie pómyśloł, że i tukej, na Bojkoblogu, nojwyższy czos, coby ło Marko cosik Wóm naszkryflać.

Był to syn żmija? Wiły? A może wtoś, wto mioł szczyńscie napić sie mlyka samodiwy (bo uratowoł jij utopcowate bajtle)?

Roztómajtych wóntków baśniowych i mitycznych znojdziecie w tekstach ło Marko w pieróny (czi rodzanice mu przi kołysce wieszczyły prziszłość? Łojciec sie go chcioł pozbyć choby Mojżysza i w koszyczku go na rzyka Wardar puściół? Umioł Marko z lasym, ptokami, rybami godać?). Ale przeca niy ino to jes sam ważne.

Tak samo cza sie popaczeć w historio, bo Marko, kiery robi za herosa dlo Syrbów, Bułgarów, czy Macedóńczyków (tak jak Janosik dlo Słowoków, Czechów, czy Poloków), żył przeca we wieku, w kierym muzumany cisły sie na Bałkan, a to co słówiańskie zaczyło łónczyć sie i plyść z tym co islamskie, tworzónc specyficzno, kulturowo-ryligijno łodmiana łorjyntu.

Te jego wszyskie przigody przi ratowaniu córki sułtana Selima, kiero chcioł porwać Czorny Arab. Te rajzy (na przikłod na Salónki), coby wyratować wziyntych w jasyr słówiańskich jyńców. Mioł nawet w Ygipcie bojować i tam jakygosi wezyra zabić!

Ja, ja - ło Marko (kiery wedug Mickiywicza żył czista lot), znojdziecie tysiónce pjyśniczek i duższych łopowieści, a co jedna, to bardzij fantazyjno.

Jak dó mie - bómba!

Bohatyr jakigo nóm czeba. Ino żeby jeszcze te Syrby trocha lepsze filmy łó nim kryńciły, bo tyn, co widzicie póniżyj, to... Szkoda godać :)