Taki bół podtytuł filmu ło Janosiku, kiery nakryńciła pora lot tymu Agniyszka Holland.

Krytyka po prymierze raczyj niy pioła. Widzów tyż aż tyla do kin na to niy poszło (chocioż jakby posumować frekwyncje z Polski, Czech i Słowacje, bółoby tego wjyncyj). Ale jo tam tyn film bardzo lubia. Widzioł żech go już pora razy (roz nawet jako syrial w TVP) i musza Wóm pedzieć, że co na to zaś pacza, to podobo mi sie łón coroz bardzij i bardzij.

Łostatnio puścił żech sie to tak trocha skuli Bojkobloga. W knidze RYLIGIO SŁÓWIAN (tukej mocie jyj kóncek) doczytoł żech sie, że w górolskich bojkach ło Janosiku łodbijajóm sie echa downych, ypickich łopowieści ło słówiańskich herosach (takich jak królewic Marko abo Ilja Muromiec). No cosik w tym, pierzicha, musi być, a i we filmie Holland znojdziecie pódobne wóntki.

Godo sie w nim na przikłod, że Janosika łolbrzimy urodziły. Że go Wile (słówniańskie nimfy takie) łoczarowały i bezto zaklinać i łodklinać umi.

Że rozumi, co zwjyrzynta godajóm (a jak na ykranie widzymy kruki abo wilki, to wiadómo - zagrożynie abo nawet i śmierć zapowiadajóm).

No pómysłowo to Holland poprzeplotała. Nawet jak ta heksa Margeta (gro jóm Maja Ostaszewsko) na ślub prziłazi, to zjowio sie, choby zło wróżka w baśniach na chrzcinach i zapowiado niyszczyńście.         

Spómino sie tyż ło diobłach, niywidzialności, kwiocie paproci, magicznych, miłosnych napojach... Naprowdy, fest bojkoblogowy film to jes.

Cza sie ino siednóńć i wynótować te wszyskie wzmianki ło cudownościach w dialogach.

Szacun do Evy Borušovičovyj - autorki scynariusza. Udało ji sie zrobić tako mało, lygyndowo antologia.

No to co, na kóniec bez legyndy ło harnasiu to niy pódzie, co? No nic. Dobre. Zalinkuja Wóm jedna. Może tako?

A póniżyj zwiastun: